ज्यागुअर ल्यान्ड रोभरको प्लेटफर्ममा बन्ने भयो टाटा अभिन्या ईभी

टाटाले निकट भविष्यमा ल्याउने तयारी गरेको इलेक्ट्रिक कार अभिन्यालाई ज्यागुअर ल्यान्ड रोभरको इलेक्ट्रिक प्लेटफर्मममा निर्माण गर्ने भएको छ । बेलायती प्रिमियम अटो ब्रान्ड ज्यागुअरले विकास गरिरहेको इलेक्ट्रिक मडुलर आर्किटेक्चरमा अभिन्या कन्सेप्टलाई निर्माण गर्ने सम्वन्धी यी दुई कम्पनीबिच एक सम्झौता भएको हो ।

सम्झौता अनुसार अभिन्या कन्सेप्ट अन्तर्गतका इलेक्ट्रिक क्रसओभरलाई टाटाले ज्यागुअरको सो नयाँ प्लेटफर्मममा निर्माण गर्नेछ । ज्यागुअरको आर्किटेक्चर, इलेक्ट्रिक ड्राइभ युनिट र ब्याट्री प्याक प्रयोग गरेबापत टाटाले उसलाई रोयल्टि तिर्ने उल्लेख गरिएको छ । सो प्लेटफर्मममा अभिन्याको प्योर इलेक्ट्रिक कार मात्र निर्माण गरिनेछ ।

ज्यागुअरले सन् २०२५ देखी इलेक्ट्रिक क्रसओभर ल्याउनेगरी अहिले नयाँ प्लेटफर्मको विकास गरिरहेको छ । सो नयाँ प्लेटफर्ममले लेबल टु अटोनोमस ड्राइभिङ र ओभर दि एयर सफ्टवेयर सपोर्ट गर्नुको साथै अत्याधुनिक र प्रविधीमैत्री हुने ज्यागुअरले जनाएको छ । सो प्लेटफर्ममा बन्ने कारले यूरो एनक्यापमा सजिलै ५ स्टार रेटिङ पाउने अनुमान गरिएको छ ।

टाटा मोटर्सले हाल नेक्सन, टिगोर र टियागो इभीलाई आफ्नो पुरानो कम्वसन प्लेटफर्ममा निर्माण गरिरहेको छ । प्योर इलेक्ट्रिक प्लेटफर्मलाई सन् २०२५ भित्र प्रयोगमा ल्याइसक्ने बताएको टाटाले सम्भवत आफ्नो पहिलो ईभी अभिन्यामार्फत लन्च गर्नसक्ने आँकलन गर्न सकिन्छ ।