सुजुकी र हुन्डाई गाडी किन्दा कुनमा बढी फाइदा ? यस्तो छ दशैं स्किम

काठमाडौं– नेपालीहरुको महान चाड दशैं नजिकिएसंगै अहिले विभिन्न कम्पनीहरुले आफ्नो उत्पादनमा उपभोक्तालाई आकर्षित गर्न अफर र स्किम ल्याइरहेका छन् । स्किम ल्याउने यस्तो लहरमा सवारीसाधन बिक्रेता कम्पनीहरु सधैं अग्रपंक्तिमा रहने गर्छन् ।

फेस्टिवल सिजनलाई सवारीसाधन बिक्रीको मुख्य सिजन समेत मानिने कारण यो समय धेरै भन्दा धेरै सवारीसाधन बिक्री गर्न बिक्रेता कम्पनीविच एकप्रकारको प्रतिस्पर्धा नै हुनेगर्छ । जसलाई उनिहरुले ल्याउने स्किम र अफरले समेत पुष्टि गर्छ । फोर ह्विलरको कुरा गर्नुपर्दा विगतका वर्षहरुमा झैं यसपटक पनि हुन्डाई र सुजुकीविच कसले राम्रो र आकर्षक स्किम ल्याउने भन्ने विषयमा प्रतिस्पर्धा भएको देखिन्छ ।

सुजुकी : मारुती सुजुकीको आधिकारिक विक्रेता सिजी मोटोकर्पले आफ्नो गाडी खरिद गर्ने ग्राहकलाई १ लाख सम्मको नगद छुट दिने बताएको छ । साथै एक्सचेन्ज मार्फत खरिद गर्दा पनि १ लाखसम्मकै एक्सचेन्ज वोनस दिने उसको भनाई छ । यस सिजनमा सुजुकी गाडी खरिद गर्ने ग्राहकले १ वर्षको निःशुल्क इन्स्योरेन्स समेत पाउनेछन् ।

हुन्डाई : हुन्डाई गाडीको आधिकारिक विक्रेता लक्ष्मी इन्टरकिन्टनेन्टल प्रालिले यसपटक नगद छुट र बम्परमा एकजना भाग्यशाली विजेतालाई एक्स्टर एसयूभी उपहार दिने बताएको छ । ‘हुन्डाई फेष्टिभ डिलाइट २०८०’ अन्तर्गत हुन्डाईका कुनै पनि गाडीको खरिदमा ग्राहकले ६ लाख रुपैयाँसम्मको आकर्षक नगद छुट र स्क्रयाच कार्डमार्फत थप एक लाख रुपैयाँसम्मको नगद छुट पाउनेछन् । साथै एक वर्षका लागि निःशुल्क सवारी बीमा तथा सवारी कर सुविधा पनि प्राप्त गर्नेछन् ।