हरिबंश किन गएनन् ६ महिना सम्म पेट्रोल पम्प ? पम्प धनीले किन हेर्छन् छड्के आँखाले उनलाई ?

कलाकार हरिबंश आचार्य आफैमा रमाइला छन् । यो सबैलाई थाहा भएकै कुरा हो । केही दिन अघि उनले यस्तै रमाइला कुरा गरे ।

उनी पेट्रोल पम्प नगएको ६ महिना भयो रे । उनलाई देख्दा पम्प धनीले अहिले छड्के आँखाले हेर्छन् रे । उनले भने, ‘म अहिले पेट्रोल पम्प नगएको ६ महिना बढी भयो । पम्प वालाले अहिले मलाई देख्दा पनि आँखा तरेर हेर्छन् । यो आउन छाड्यो भनेर ।’

सन्दर्भ थियो इलेक्ट्रिक सवारी ब्रान्ड बीवाईडीको शोरुम उदघाटन समारोहको । गत बुधबार भक्तपुरको सल्लाघारीमा बीवाईडीको नयाँ शोरुमको शुभारम्भ भयो । सो अवसरमा कलाकार हरिबंश आचार्य समेत उपस्थित थिए । उनले आफ्नो मन्तव्य राख्ने क्रममा यो कुरा बताएका हुन् ।

त्यसो त कलाकार आचार्य बीवाईडीको नेपालका लागि ब्रान्ड एम्बेसडर समेत हुन् । उनले सोही हैसियतमा त्यहाँ बीवाईडी र इलेक्ट्रिक सवारी साधनको महत्व वारेमा पनि बताएका थिए ।

उनले भने, ‘नेपालमा पेट्रोल छ, तर कहाँ छ थाहा छैन । निकाल्न सकिने वारेमा पनि थाहा छैन । तर बिजुली छ । त्यसैले बिजुलीबाट चल्ने गाडी चढ्दा फाइदा हुन्छ । नेपालकै उत्पादन प्रयोग गर्न सकिन्छ । मैले पनि बिजुली गाडी चढे पछि रमाइलो अनुभव गरेको छु ।’

कलाकार आचार्यले हाल बीवाईडी एट्टो ३ इलेक्ट्रिक गाडी प्रयोग गरिरहेका छन् ।