जी मोटर्स हुँदै जी ईभीमा फड्को : नाडा अटो शोमा ल्याउँदै छ जी ईभीले सर्बाधिक रेन्जको ईभी

काठमाडौं – आगामी भाद्र २६ देखि ३१ सम्म काठमाडौंको भृकुटी मण्डपमा आयोजना हुने नाडा अटो शो २०२३ मा एउटा नयाँ इलेक्ट्रिक चार पांग्रे ब्रान्डले पहिलो पटक भाग लिदैछ । सबै गरी १६ ब्रान्डले भाग लिने भनिएकोमा एउटा ब्रान्ड जी ईभी पनि छ ।

जी ईभीको नाम सार्वजनिक हुनासाथ धेरैले यसको वारेमा चासो गरेका छन् । नयाँ नाम भएको र पहिले कतै नसुनिएको यो नाम कहाँको हो र कुन ब्रान्डको सवारी साधन आउने हो भन्ने वारेमा पनि धेरैले चासो राखे । यद्यपि एउटा नयाँ ब्रान्डको इलेक्ट्रिक सवारी साधन नेपाली बजारमा भित्रिने र नाडा अटो शोमा सार्वजनिक हुने चर्चा मात्र हाल सम्म सार्वजनिक भएको छ ।

पछिल्लो समयमा जी ईभी भनेको हाल अटोमोबाइल बजारमा प्रचलित जी मोटर्सकै अर्को नाम हो भन्ने तथ्य सार्वजनिक भएको छ । जी मोटर्सले एउटा नयाँ ब्रान्डको इलेक्ट्रिक सवारी साधन सार्वजनिक गर्दैछ भन्ने तथ्य सार्वजनिक भएको छ । सो मिड प्रिमियम सेगमेन्टको इलेक्ट्रिक कारले हाल नेपाली बजारमा उपलब्ध इलेक्ट्रिक कार मध्ये सबैभन्दा धेरै रेन्ज दिने चर्चा समेत चलेको छ ।

नेपाली बजारमा जी मोटर्स एक प्रचलित नाम पनि हो । अब जी मोटर्सबाट विकसित हुँदै जी ईभीले नयाँ इलेक्ट्रिक सवारी साधन नेपाली बजारमा उपलब्ध गराउने भएको छ ।

विगत १६ वर्ष देखि अटोमोबाइल व्यवसायमा कार्यरत युवा व्यवसायी कैलाश बाबु गेलालले सञ्चालन गरेको जी मोटर्सले पछिल्लो समयमा रेनो र वुलिङ ब्रान्डका सवारी साधनको डिलरको रुपमा कार्य गरिरहेको छ । काठमाडौं उपत्यकाका साथै इटहरीमा जी मोटर्सको शोरुम छ । त्यसैगरी इटहरीमा कियाको समेत शोरुम सञ्चालन गरेको छ ।

यद्यपि जी ईभीले ल्याउने इलेक्ट्रिक कारको वारेमा भने कुनै आधिकारिक जानकारी सार्वजनिक गरिएको छैन । अटो शोकै अवसरमा यसको वारेमा सबै जानकारी सार्वजनिक गरिने बताइएको छ ।