यस्तो छ नेपाल आउने तयारीमा रहेको इलेक्ट्रिक कार किया ईभी–६

किया गाडीको नेपालका लागि आधिकारिक वितरक कन्टिनेन्टल ट्रेडिङले नयाँ इलेक्ट्रिक कार ईभी–६ नेपाल ल्याउने अन्तिम तयारी थालेको छ । भदौ अन्तिममा आयोजना हुने नाडा अटो शोबाट डेलिभरी दिनेगरी कम्पनीले यो कारको वुकिङ समेत लिन थालिसकेको छ । कम्पनीले ईभी–६ को मूल्य वाहिर नल्याइसकेको भएपनि १ करोडमाथी पर्ने आँकलन गरिएको छ ।

किया ईभी–६ मा ७७.४ किलोवाट आवर क्षमताका ब्याट्री र १६८.१ किलोवाट क्षमताको पर्मानेन्ट म्याग्नेट सिंक्रोनास मोटर दिएको छ । यो पावरफुल इलेक्ट्रिक कारलाई एकपटक फुल चार्ज गर्दा ५२८ किलोमिटर गुडाउन सकिने दावी गरिएको छ । यसको टर्क ३५० एनएम रहेको छ ।

सुरक्षाका लागि ईभी–६ मा एडिएएस फिचर पाउन सकिन्छ । त्यसमा पार्किङ डिस्ट्यान्स वार्निङ, ७ वटा एयरव्याग, हाइट अनुसार मिलाउन मिल्ने सिट बेल्ट, इलेक्ट्रोनिक्स अटोहोल्ड पार्किङ ब्रेक जस्ता फिचर उपलब्ध छन् । विश्वभर निकै चर्चा र सफलता पाएको ईभी–६ मा अगाडि र पछाडि नै १७ इन्चको डिस्क ब्रेक, इन्टरग्रेटेड इलेक्ट्रोनिक्स ब्रेकिङ सिस्टम, मल्टी कोलिजन ब्रेक र अटो होल्डसहितको इलेक्ट्रीक पार्किङ ब्रेक दिइएको छ ।

यो कारको इन्टेरियर एकदमै आकर्षक र आरामदायी रहेको छ । कम्पनीले यसमा डबल स्पोक स्टेरिङ ह्वील, हिटेड स्टेरिङ, प्रिमियम लेदर सिट, सेन्टर आर्म रेष्टमा कप होल्डर, मुड ल्याम्प, पछाडि पनि फोल्डिङ गर्न मिल्ने सिट दिएको छ । कियाले ईभी–६ मा १२.३ इन्चको टीएफटी डिस्प्ले दिएको छ ।

साथै यसमा क्रुज कन्ट्रोल, वायरलेस चार्जर, ढोकामा पनि अटो डिफगर, अटोमेटीक क्लाइमेट कन्ट्रोल र प्रिमियम एयर फिल्टर लगायत पाउन सकिन्छ । यो नयाँ कारको ग्राउन्ड क्लिरियन्स १७८ एमएम रहको छ ।