वेलायतमा खुल्ने भयो टाटाको पहिलो ईभी ब्याट्री प्लान्ट

टाटा ग्रुपले आफ्नो पहिलो ईभी ब्याट्री प्लान्ट वेलायतमा खोल्ने भएको छ । टाटा गाडी र ज्याकुअर ल्यान्ड रोभर जस्ता लक्जरी कार उत्पादन गर्दै आएको यो ग्रुपले वेलायतमा व्याट्री प्लान्ट खोल्न ४ अर्व पाउन्ड खर्च गर्ने जनाएको हो । ग्रुपले हाल भारतमा टाटा र वेलायतस्थित प्लान्टबाट ज्याकुअर र ल्यान्ड रोभरका लक्जरी कार उत्पादन गरी बिक्री गर्दै आएको छ ।

टाटाको सो प्लान्टले वार्षिक ४० जीगावाट आवर क्षमताको इभी व्याट्री उत्पादन गर्न सक्ने जनाइएको छ । सो प्लान्टबाट उत्पादन हुने व्याट्रीले वेलायतको अन्तरिक खपतमा ४० प्रतिशत योगदान दिने कम्पनीको भनाई छ । सन् २०३० सम्म बेलायतमा वार्षिक १०० जीगावट आवर व्याट्री आवश्यक पर्ने र सो मागलाई पुरा गर्न निशानले पनि ३८ जीगावट आवरको अर्को नयाँ प्लान्ट लगाउने तयारी गरिरहेको छ ।

वेलायतस्थित टाटाको प्लान्टबाट उत्पादन हुने व्याट्री युरोपेली बजारलाई लक्षित गरिएका कारण भारतमा उत्पादन हुने टाटा गाडीमा भने सोको प्रयोग तत्कालै नहुने देखिएको छ ।