अब भारतमा पनि कारको क्रयास सेफ्टी टेस्ट हुने

आजको समयमा कारको क्रयास सेफ्टी टेस्ट निकै नै आवश्यक भइसकेको छ । सो परीक्षणले कारको सेफ्टीको बारेमा जानकारी हासिल गर्न सकिन्छ । विश्वका ठुला कार निर्माता कम्पनीको कारको सेफ्टी परीक्षण गरिन्छ ।

तर भारतमा ठुला कार निर्माता कम्पनी भए तापनि कारको सेफ्टी परीक्षण गर्ने कुनै व्यवस्था थिएन । अब भने भारतमा पनि कारको सेफ्टी टेस्ट गर्न सकिने भएको छ । भारत सरकारले अक्टोबर १ देखि कार क्रयास सेफ्टी स्टार रेटिङ लागु गर्ने भएको छ ।

यसलाई भारतमा न्यु कार एसेसमेन्ट प्रोग्राम वा भारत एनसीएपी नामबाट ल्याइनेछ । यो भारतमा कारको सेफ्टी मापदण्डको लागि हुनेछ । कार निर्माता कम्पनी मारुती सुजुकी, टाटा मोटर्स, टोयोटा, स्कोडा, किया र महिन्द्राले सरकारको यो कदमलाई स्वागत गरेका छन् ।

भारतमा कार उत्पादन गर्र्ने वा निर्यात गर्ने कार कम्पनीले आफ्नो सवारी साधनको सेफ्टी परीक्षण गर्नुपर्ने छ । यो क्रयास टेस्ट वा सेफ्टी रेटिङ अटोमोटिभ इन्डस्ट्री स्ट्याण्डर्ड १९७ अनुसार हुनेछ ।

भारत सरकारले भारत एनसीएपीको प्यारामिटरलाई फाइनल गरेको छ । सेफ्टी मानक प्यारामिटरले अन्य मापदण्डलाई पनि ध्यानमा राखेको छ, यसमा कारको पेडेस्ट्रियन फ्रेन्डली डिजाइन र सवारी साधनको स्ट्रक्चरल सेफ्टी समावेश छ ।

यसका साथै एक्टिभ एण्ड प्यासिभ सेफ्टी असिस्ट टेक्नोलोजी र वयस्क तथा बालबालिका यात्रुको सेफ्टीलाई पनि ध्यानमा राखेर डिजाइन गरिएको छ । यसले ग्लोबल एनसीएपी वा युरो एनसीएपीले जस्तै कारको सेफ्टी रेटिङ निर्धारण गर्नेछ । यो धेरै खर्चिलो र समय खपत गर्ने प्रक्रिया हो ।

सरकारले भारत एनसीएपीको परीक्षण प्रोटोकल विश्वव्यापी क्रयास टेस्ट प्रोटोकलसँग मिल्दोजुल्दो रहेको बताएको छ । भारतमा सवारी साधनको लागि १ देखि ५ स्टार रेटिङ हुनेछ ।