प्रभु बैंकले विद्युतीय सवारी साधनमा ऋण लगानी गर्ने, लक्जेम्बर्गको एक बैंकबाट ६६ करोड प्राप्त

काठमाडौं – प्रभु बैंकले विद्युतीय सवारी साधनमा लगानी गर्नका लागि लक्जेम्बर्गको ‘एमएसएमई इन्टरप्राइजेज बन्ड एस ए’ बाट ५० लाख डलर अर्थात ६६ करोड २७ लाख रुपैयाँ ऋण सहयोग प्राप्त गरेको छ ।

विश्व वातावरण दिवसमा हरित लगानी अन्तर्गत विद्युतीय सवारीसाधनमा लगानी गर्न चार वर्ष अवधिका लागि ऋण पाएको बैंकका प्रमुख कार्यकारी अधिकृत अशोक शेरचनले जानकारी दिएका छन् ।

बैंकलाई प्राप्त रकम सार्वजनिक यातायात र व्यक्तिगत प्रयोजनका लागि प्रयोग हुने विद्युतीय सवारीसाधनहरू खरिद तथा आयातका लागि सहज रुपमा उपलब्ध गराइने छ ।

बैंकले वैकल्पिक ऊर्जा तथा एमएसएमई व्यवसाय प्रवर्द्धनका लागि अन्य अन्तर्राष्ट्रिय संस्थाहरुसँग पनि सहकार्यका लागि पहल गरिरहेको छ।