सीट हाइट कम भएर आउँदै केटिएम २५० र ३९० एड्भेन्चर

केटीएमले आफ्नो एड्भेन्चर मोटरसाइकल २५० र ३९० लाई सिट हाइट कम गरेर नयाँ भेरिएन्टमा ल्याउने भएको छ । सिट हाइट ८५५ एमएम रहेको कारण औषत उचाई भएका व्याक्तिलाई वाइक ह्यान्डिल गर्न निकै सकस पर्ने गरेको गुनासो वढ्न थालेपछि नयाँ छुट्टै भेरिएन्ट ल्याउन लागिपरेको कम्पनीले जनाएको छ ।

सीट हाइट वढी भएकै कारण संभावित ग्राहक गुमाउनु परेको ठहर गर्दै केटीएमले यो नयाँ भेरिएन्टलाई छिट्टै लन्च गर्ने तयारी अघि वढाएको छ ।

सिट हाइट वढी भएकै कारण औषत उचाई भएका राइडरलाई सहज होस भनेर कम्पनीले यसअघि यी वाइकको पछाडीको सस्पेन्सनलाई केही तल झारिदिएकोे थियो । जसवारे ग्राहकले मिश्रीत प्रतिक्रया दिँदै नयाँ भेरिएन्ट नै लन्च गर्न सुझाव दिएका थिए ।

सोही सुझावलाई मध्येनजर गर्दै कम्पनीले कम सिट हाइटमा नयाँ भेरिएन्ट ल्याउने निचोड निकालेको हो । नयाँ भेरिएन्टको सीट हाइट कती हुन्छ भन्ने विषयमा केटिएमले हालसम्म कुनै जानकारी भने वाहिर ल्याईसकेको छैन ।

वाइकको सिट हाइट कम गर्न कम्पनीले हालकै भेरिएन्टको अगाडी र पछाडी दुवै भागमा जडान गर्ने सस्पेन्सनलाई केही तल झार्न सक्ने आँकलन गरिएको छ । यसरी सस्पेन्सन तल झार्दा सकेसम्म ग्राउन्ड क्लिरियन्स भने कम हुन नदिइने कम्पनीको भनाई छ ।