तीन दिनपछि सुजुकीका दुई नयाँ एसयूभी लन्च हुने, यस्ता छन् विशेषता

सुजुकी गाडीको नेपालका लागि आधिकारिक विक्रेता सिजी मोटोकर्पले शुक्रवार दुई नयाँ एसयूभी लन्च गर्ने भएको छ । कम्पनीले मिड साइज एसयूभी ग्रान्ड भिटरा र सव फोर मिटर एसयूभी व्रेजालाई औपचारिक लन्च गर्न लागेको हो । यी दुईवटै एसयूभीलाई कम्पनीले केही समययता सोरुममा पठाएर वुकिङ लिँदै आएको छ ।

मारुती सुजुकीले भारतमा निर्माण गरेको यी दुई एसयूभी मध्ये व्रेजा यसअघिको भिटारा व्रेजाको नयाँ अवतार हो भने ग्रान्ड भिटारा ब्रान्ड न्यू मोडल हो । व्रेजाको शुरुवाती मूल्य ४२ लाख र ग्रान्ड भिटाराको ८० लाख हाराहारी मूल्य निर्धारण गरेर विक्री शुरु गर्न लागिएको हो ।

यी दुई एसयुभीमा समान क्षमताको इन्जिन जडान गरिएको छ । दुवै एसयूभीमा १.५ लिटर के १५ सी इन्जिन जडान गरिएको हो । एउटै इन्जिन भएका कारण दुवै एसयूभीको पावर र टर्क समेत समान छ । यी दुवै एसयूभीले १०३ एचपी पावर र १३६ एनएम टर्क जेनेरेट गर्छन् ।

व्रेजामा प्याडल सिफ्टर सहित ५–स्पिड म्यानुअल र ६–स्पिड अटोमेटिक गियरबक्स दिइएको छ भने ग्रान्ड भिटरामा ५ स्पीड म्यानुअल र ६ स्पीडको टर्क कन्भर्टर गियरबक्स दिएको छ । ग्रान्ड भिटरामा इन्जिनसँग सिन्क्रोनास एसी मोटर जडान गरिएको छ ।

यो हाइब्रिड इन्जिनको संयुक्त पावर ११४ बीएचपी र टर्क १४१ एनएम रहेको छ । हाइव्रिड इन्जिका कारण यसको माइलेज समेत उच्च छ । ग्रान्ड भिटराले २८ किलोमिटर माइलेज दिने दावी गरिएको छ ।

व्रेजामा ९ इन्चको टचस्क्रिन इन्फोटेनमेन्ट सिस्टम र फ्ल्याट बटम स्टेयरिङ छ । त्यसैगरी ३६० डिग्री क्यामेरा, अटोमेटिक क्लाइमेट कन्ट्रोल, १२ भोल्टको सकेट र पुस स्टार्ट स्टप बटन दिइएको छ । उता ग्रान्ड भिटरामा पनि ४० भन्दा बढी कनेक्ट फिचर सहितको ९ इन्चको टचस्कृन इन्फोटेन्मेन्ट सिस्टम र फुल्ली डिजिटल इन्स्ट्रयुमेन्ट क्लस्टर पाउन सकिन्छ ।

टप भेरियन्टमा अगाडि दुबै सिटमा भेन्टीलेटेड सिट छ भने ३६० डिग्री सराउण्ड भ्यू क्यामेरा, वायरलेस चार्जर, डिभाइस लेफ्ट अलर्ट सिस्टम पनि पाउन सकिन्छ । यी दुवै एसयूभीमा पनारोमिक सनरुफ समेत दिइएको छ ।

सुरक्षाका लागी यी दुईवटै एसयूभीमा ६ वटासम्म एयर व्याग दिएको छ । दुवै एसयूभीमा इलेक्ट्रोनीक स्टेविलीटी कन्ट्रोल, टायर प्रेसर मोनिटरीङ सिस्टम र चारवटै चक्कामा डिसब्रेक दिइएको छ । साथै, चालकको सहजताका लागि हिलहोल्ड असिस्ट, हिल डिसेन्ट कन्ट्रोल र टीपीएमएस जस्ता सुविधा उपलब्ध छ ।