६ महिनामा बिक्री भयो १ लाख युनिट रोयल इन्फिल्ड हन्टर

रोयल इन्फिल्ड हन्टर ३५० बाइक अत्याधिक लोकप्रिय बाइकमध्ये एक हो । कम्पनीले हालसम्म हन्टर ३५० को १ लाखभन्दा बढी युनिट बिक्री गरेको खुलासा गरेको छ ।

रोयल इन्फिल्डले सन् २०२२ मा मस्कुलर–रेट्रो स्टाइलमा हन्टर ३५० लन्च गरेको थियो । हन्टर ३५० ले भारतको प्रतिष्ठित इन्डियन मोटरसाइकल अफ द इयर २०२३ अवार्ड पनि जितेको छ । कम्पनीले सो बाइक निर्यात पनि गर्न थालेको छ ।

रोयल इन्फिल्ड हन्टर ३५० मा ३४९ सीसी, सिंगल सिलिन्डर, एयर र आयल कुल्ड, फ्युल इन्जेक्टेड इन्जिन जडान गरिएको छ । सो इन्जिनले २०.२ बीएचपी पावर र २७ एनएम टर्क जेनेरेट गर्छ । इन्जिन ५ स्पिड म्यानुअल गियरबक्ससँग जोडिएको छ । बाइक फ्रन्टमा डिस्क ब्रेक र रियरमा सिंगल वा ड्युअल च्यानल एबीएसको साथ उपलब्ध छ ।

बाइकको अगाडि टेलिस्कोपिक फोर्क र पछाडि ड्युअल स्प्रिङ–लोडेड शक एब्जर्बर दिइएको छ । बाइकको टायर १७ इन्चको छ । हन्टर ३५० मा डिजिटल–एनालग इक्न्स्ट्रयुमेन्ट क्लस्टर र अप्सनल ट्रिपर नेभिगेसन जस्ता फिचर रहेको छ ।

रोयल इन्फिल्ड हन्टर ३५० ले टीभीएस रोनिन, होन्डा सीबी३५० आरएस, जावा ४२ र येज्दी रोडस्टरसँग प्रतिस्पर्धा गर्छ ।

नेपाली बजारमा पनि यो बाइक आगामी दिनमा आउने सम्भावना छ । नेपालमा पहिले ठूलो सीसीका बाइकमा प्रतिबन्ध लगाइएको कारण उपलब्ध हुन सकेको थिएन । आगामी दिनमा भने यो बाइक पनि आउने अनुमान गर्न सकिन्छ ।