एक्सयूभी ७०० संग प्रतिस्पर्धा गर्न सुजुकीले ग्राण्ड भिटरालाई ‘थ्री रो’ भर्सनमा उतार्ने

मारुती सुजुकीले आफ्नो लोकप्रिय कम्प्याक्ट एसयूभी ग्राण्ड भिटरलाई ‘थ्रि रो’ भर्सनमा उतार्ने भएको छ । सन् २०२५ सम्ममा बजारमा ल्याइसक्ने गरी यसमा काम अघि वढिसकेको कम्पनीले जनाएको छ ।

यो एसयूभीलाई सुजुकीले वाई१७ कोडनेम दिएर उत्पादन प्रक्रिया अघि बढाएको हो । जुन हाल कारोवार भइरहेको ग्राण्ड भिटरको एक्सपोर्ट भर्सन हुनेछ । बजारमा आएपछि यसको प्रतिस्पर्धा महिन्द्रा एक्सयूभी ७०० र टाटा सफारी लगायतसंग हुने अनुमान लगाइएको छ ।

यो नयाँ भर्सनमा सुजुकीले ग्राण्ड भिटराकै प्लेटफर्म र पावरट्रेनलाई शेयर गर्ने जनाइएको छ । थ्री सिट रो हुने कारण यसको ह्विल वेश भने स्ट्यान्डर्ड भिटराभन्दा केही लामो हुनेछ । यो एसयूभी पेट्रोल र पेट्रोल हाइव्रिड पावरट्रेनमा उपलव्ध हुनेछ । जसको उत्पादन सुजुकीले निकट भविष्यमा संचालनमा ल्याउने तयारी थालेको हरियाणास्थित नयाँ प्लान्टबाट हुनेछ । यो प्लान्टको क्षमता वार्षिक २ लाख ५० हजार युनिट कार उत्पादन गर्नसक्ने रहेको छ ।

हाल उपलब्ध ग्राण्ड भिटारामा लेयर्ड ड्यासबोर्ड, सेन्टर कन्सोल, एप्पल कारप्ले, एन्ड्रोइड अटो कनेक्टिभिटी सहितको ९ इन्चको टचस्क्रिन इन्फोटेनमेन्ट सिस्टम, ठूलो एमआईडी भएको सेमी–डिजिटल इन्स्ट्रयुमेन्ट क्लस्टर, ६ वटा एयरब्याग, ३६० डिग्री क्यामेरा सिस्टम, हेड–अप डिस्प्ले, अटोमेटिक क्लाइमेट कन्ट्रोल, क्रुज कन्ट्रोल, इलेक्ट्रिक सनरुफ, इन्जिन स्टार्ट÷स्टप बटन, वायरलेस चार्जिङ डक, रियर एसी भेन्ट्स जस्ता फिचर उपलब्ध छ ।

नयाँ ग्रान्ड भिटारमा माइल्ड हाइब्रिड टेक्नोलोजी भएको १.५ लिटर ४ सिलिन्डर के१५सी डुअलजेट पेट्रोल इन्जिन छ । जसले ६००० आरपीएममा १०३ पीएसको पावर र ४४०० आरपीएममा १३५ एनएमको टर्क जेनेरेट गर्छ ।