बैशाख यता मात्र ३ एसेम्बल उद्योग दर्ता : नेपालमै सवारी उत्पादनमा जोड

काठमाडौं – सरकारले विदेशबाट गाडी आयातमा प्रतिबन्ध लगाइरहेको अवस्थामा देशभित्र एसेम्बल उद्योग खोल्नका लागि भने व्यवसायीहरु हौंसिएका छन् । गत आर्थिक वर्ष अर्थात २०७८ साउन देखि २०७९ असार सम्मको अवधिमा ६ वटा यस्ता एसेम्बल उद्योग दर्ता भए । त्यसैगरी बैशाख यता हाल सम्म ३ उद्योग दर्ता भएका छन् ।

बैशाख यता दुगड अटो क्लिनिक, एसजी अटोक्राफ्ट प्रालि र टीजी अटो ग्रुप प्रालि गरी ३ वटा एसेम्बल उद्योग स्थापनाका लागि उद्योग विभागमा दर्ता भएका छन् ।

दुगड अटो क्लिनिक प्रा.लि.
मकवानपुरको हेटौंडा औद्योगिक क्षेत्रमा स्थापना हुने गरी दुगड अटो क्लिनिकको दर्ता गत जेठ १२ गते भएको हो । यसका लागि ३० करोड रुपैयाँ लगानी हुनेछ भने २४ हजार दुई पांग्रे र ४ हजार तीन पांग्रे सवारी साधन उत्पादन गरिने छ । यसमा १४५ जनाले रोजगारी पाउने छन् ।

एसजी अटोक्राफ्ट प्रा.लि.
बारा जिल्लाको जीतपुर सिमरा उपमहानगपालिका वडा नम्बर ११ मा स्थापना हुने गरी एसजी अटोक्राफ्ट प्रालिको दर्ता गत जेठ १७ गते भएको छ । यसमा ३ अर्ब रुपैयाँको लगानी हुनेछ भने वार्षिक विद्युतीय मोटरसाइकल तथा स्कुटर २१ सय थान, विद्युतीय तीनपांग्रे १२ सय थान, विद्युतीय कार–जिप ६ सय र ई–बस १२० थान उत्पादन गरिनेछ । यसमा ४३१ जनाले रोजगारी पाउने छन् ।

टीजी अटो ग्रुप प्रालि
बारा जिल्लाको जीतपुरसिमरा उपमहानगपालिका वडा नम्बर ९ स्थापना हुने गरी टीजी अटो ग्रुप प्रालिको दर्ता गत भदौँ २ गते भएको हो । यसका लागि ३८ करोड लगानी हुनेछ भने वार्षिक ८ हजार मोटसाइकल उत्पादन गरिने छ । यसमा ६७ जनाले रोजगार पाउने छन् ।

यी तीनवटै एसेम्बल उद्योग स्थापनाका लागि आवेदन दिने कम्पनीहरुले हाल नेपालमा विभिन्न ब्रान्डका सवारी साधन आयात गरी कारोबार गरिरहेका छन् । दुगड अटो क्लिनिक दर्ता गर्ने दुगड समूहले हाल नेपाली बजारमा भेस्पा र अप्रिलियाका स्कुटरका साथै पियाजियो ब्रान्डको थ्री ह्विलरको व्यवसाय गरिरहेको छ । यो समुहले महिन्द्रा ब्रान्डको कमर्सियल भेइकल र हेभी इक्विपमेन्ट तथा टाटा हिटाची ब्रान्डको हेभी इक्विपमेन्ट समेत आयात गरी कारोबार गर्दै आइरहेको छ । यसैगरी जोन डियर ट्याक्टर र बीकेटी टायरको वितरकका रुपमा समेत यही समुहले कार्य गरिरहेको छ ।

एसजी अटोक्राफ्ट प्रालि स्थापना गर्ने एसजी ग्रुप अन्तर्गतको एसएलआर टेक्नो एन्ड ट्रेडले मोटरहेड र ओम मोटोकर्पले ट्यारो ब्रान्डका बाइक तथा स्कुटरको कारोबार गरिरहेको छ । टीजी अटो ग्रुप स्थापना गर्ने त्रिवेणी ग्रुप अन्तर्गतको अल्फा अटोमोटिभले हालै रोयल इन्फिल्ड मोटरसाइकलको कारोबार थालेको छ ।