१० लाख नयाँ कार र व्याट्री उत्पादन गर्न मारुती सुजुकीको २ नयाँ प्लान्ट उद्घाटन

मारुती सुजुकीले भारतमा हिँजो नयाँ उत्पादन प्लान्टको उद्घाटन गरेको छ । हरियानामा अवस्थित सो नयाँ प्लान्टको उद्घाटन प्रधानमन्त्रि नरेन्द्र मोदीले गरेक हुन् । नयाँ प्लान्टले वार्षिक १० लाख नयाँ कार उत्पादन गर्न क्षमता राख्ने जनाइएको छ ।

मोदीले हिँजै गुजरातमा अर्को इभी व्याट्री प्लान्टको समेत उद्घाटन गरेका छन् । यो नयाँ प्लान्टमा सुजुकीले ७ हजार ३ सय करोड भारु लगानी गर्ने योजना बनाएको छ । भारतमा सुजुकीले मारुतीसंगको सहकार्यमा गाडी उत्पादन थालेको ४० वर्ष पुरा गरेको अवसर पारेर यी नयाँ प्लान्ट उद्घाटन गरिएका हुन् ।

यो नयाँ उत्पादन प्लान्ट विश्वकै ठूलो मध्ये एक हुने वताइएको छ । इन्डो– जापनिज ब्रान्ड मारुती सुजुकीको सवैभन्दा ठूलो बजार भारतमा रहँदै आएको छ । सुजुकीले वर्षमा विश्वभर कुल २८ लाख कार उत्पादन गर्ने गरेकोमा यसको ६० प्रतिशत अर्थात १६ लाख कार भारतमा मात्रै उत्पादन भैरहेको छ ।

भारतमा सुजुकीको साना र सस्ता कार सर्वाधिक लोकप्रिय वनिरहेका छन् । यो ब्रान्डले कम्वस्चन इन्जिनको विकल्पमा सिएनजी र हाइव्रिड गाडीको निर्माणमा जोड दिइरहेको छ भने सन् २०२५ देखी इलेक्ट्रिक कार समेत बजारमा ल्याउने योजना बनाएको छ ।