४५० सीसी रोयल इन्फिल्ड हिमालयन बाइकको टिजर सार्वजनिक

रोयल इन्फिल्डको चर्चामा रहेको मोडल नयाँ हिमालयन ४५० परीक्षणको क्रममा देखिएको छ । रोयल इन्फिल्डका सीईओ सिद्धार्थ लालले आफ्नो इन्स्टाग्राम पेज मार्फत रोयल इन्फिल्ड हिमालयन ४५० को भिडियोको टिजर सार्वजनिक गरेका छन् । यस टिजर भिडियोमा हिमालयन ४५० को बाइक नदी तर्दै गरेको देख्न सकिन्छ ।

रोयल इन्फिल्ड हिमालयन ४५० मा नयाँ एलईडी हेडल्याम्प र विन्डस्क्रिन प्रयोग गरिएको छ । यसमा नयाँ टर्न इन्डिकेटर र हेलोजनको सट्टामा एलईडी एलिमेन्टको प्रयोग गर्ने अनुमान गरिएको छ । सो बाइकमा हिमालयन ४११ का केही डिजाइन यथावत राखिएको छ ।

नयाँ हिमालयन ४५० मा नयाँ इन्स्ट्रयुमेन्ट क्लस्टर र अप्सनल ट्रिपर नेभिगेसन सिस्टम रहेको छ । बाइकको अगाडि २१ इन्च पाङ्ग्रा र पछाडि १७÷१८ इन्च पाङ्ग्रा छ । साथै अगाडि र पछाडि डिस्क ब्रेक जडान गरिएको छ र ड्युअल–च्यानल एबीएसलाई स्ट्यान्डर्ड रूपमा पेश गरिएको छ ।

बाइकको फ्रन्टमा नयाँ अप–साइड डाउन फोर्क्स र पछाडि मोनो–शक दिइएको छ । यसमा ४५० सीसीको लिक्विड कुल्ड इन्जिन हुने अपेक्षा गरिएको छ । सो इन्जिनले करिब ४५ एचपीको पावर उत्पादन गर्ने अपेक्षा गरिएको छ । ट्रान्समिसनको लागि यसमा स्लिपर क्लचसहितको ६ स्पिड युनिट रहेको छ ।

भारतीय बजारमा रोयल इन्फिल्ड हिमालयन ४५० ले केटीएम ३९० एड्भेन्चर, येज्दी एड्भेन्चर जस्ता बाइकसँग प्रतिस्पर्धा गर्नेछ ।