नयाँ मारुती सुजुकी अल्टो के१० सार्वजनिक : यस्ता छन् महत्वपूर्ण विशेषता

मारुती सुजुकी अल्टो के१० भारतमा लन्च गरिएको छ । सो कार स्ट्यान्डर्ड, एलएक्सआई, भीएक्सआई र भीएक्सआई प्लस गरी चार भेरिएन्टमा उपलब्ध हुनेछ । स्ट्यान्डर्ड भेरिएन्टको मूल्य ३ लाख ९९ हजार र सबैभन्दा माथिल्लो भीएक्सआई प्लस भेरिएन्टको मूल्य ५ लाख ८४ हजार भारु तोकिएको छ ।

नयाँ अल्टो के१० नयाँ डिजाइन, आधुनिक सुविधाहरू र उपकरण तथा राम्रो सुरक्षा उपकरणसहित ल्याइएको छ भने इन्जिनमा पनि परिवर्तन गरिएको छ । यो अहिलेसम्मको भारतीय बजारमा सबैभन्दा बढी बिक्री हुने कार हो र विगत २२ वर्षदेखि भारतीय बजारमा राज गर्दै आएको छ ।

अल्टो के१० मारुती सुजुकीको हार्टेक्ट प्लेटफर्ममा आधारित छ । यसको लुकको कुरा गर्दा अगाडि हेक्सागोनल मेससहितको कालो ग्रिल दिइएको छ भने दुवैतिर पातलो र गोलाकार हेडलाइटहरू उपलब्ध छन् । बम्परको तल्लो भागमा पातलो एयर ड्याम छ । सुजुकीको लोगो बीचमा राखिएको छ । नयाँ लाइन र क्रिजका कारण यो निकै आकर्षक देखिन्छ ।

फिचरको सन्दर्भमा यसमा रिमोट–की, स्मार्टप्ले ७ इन्च टचस्क्रिन इन्फोटेनमेन्ट सिस्टम, एन्ड्रोइड अटो, एप्पल कारप्ले सपोर्ट र स्टेयरिङ–माउन्टेड अडियो कन्ट्रोल यसमा उपलब्ध हुनेछ । टचस्क्रिन इन्फोटेनमेन्ट सिस्टम पहिलो पटक दिइने भएको छ, जुन अहिलेसम्म ठूला कारमा मात्रै देखिन्थ्यो । नयाँ अल्टो के१० मा यूएसबी पोर्ट, डिजिटल इन्स्ट्रयुमेन्ट क्लस्टर, म्यानुअल एसी जस्ता सुविधाहरू प्रदान गरिएको छ ।

सुरक्षाका हिसाबले अगाडि दुईवटा एयरब्याग, रियर पार्किङ सेन्सर, एबीएस, रिभर्स पार्किङ सेन्सर, इलेक्ट्रोनिक ब्रेक फोर्स डिस्ट्रिब्युसन, प्रि–टेन्सन र फोर्स लिमिटर, फ्रन्ट सिट बेल्ट आदि उपलब्ध गराइएको छ ।

नयाँ अल्टो के१० मा १.० लिटरको के१०सी इन्जिन उपलब्ध छ । यसले पहिले उपलब्ध ०.८ लिटर एफ८डी इन्जिनको स्थान लिनेछ । सो इन्जिनले ६६ बीएचपी पावर र ८९ एनएम टर्क जेनेरेट गर्छ । यसमा आइडल स्टार्ट स्टप फङसन हुनेछ, जसले माइलेज बढाउनमा मद्दत गर्नेछ । यसमा स्ट्यान्डर्ड ५–स्पिड म्यानुअलका साथ एजीएस गियरबक्स अप्सन उपलब्ध हुनेछ ।

यसको अटोमेटिक भेरिएन्टले २४.९ र म्यानुअल भेरिएन्टले २४.३९ किलोमिटरको माइलेज दिने कम्पनीको भनाइ छ । सो कार विभिन्न ६ कलर अप्सनमा उपलब्ध हुनेछ ।

अल्टो के१० मा धेरै परिमार्जन गरिएको छ र यो पहिले भन्दा सानदार तथा आधुनिक लाग्छ । नेपाली बजारमा पनि यो कार केही समय पछि आउन सक्छ । ग्राहकले कति मन पराउछन् भन्ने कुरा भने भविष्यमा नै थाहा हुनेछ ।