फायरप्रुफ ब्याट्री भएको इलेक्ट्रिक स्कुटर नेपालमा

काठमाडौं – नेपाली बजारमा फायरप्रुफ ब्याट्रीयुक्त इलेक्ट्रिक स्कुटर भित्रिएको छ । केही समय पहिले देखि नै कोमाकीका इलेक्ट्रिक स्कुटर बिक्री–वितरण गरिरहेको युनिटी ट्रेडिङ प्रालिले कोमाकी डीटी ३००० इलेक्ट्रिक स्कुटर उपलब्ध गराउने बताएको छ ।

कम्पनीले आगामी दुई साता भित्र डेलिभरी दिने गरी यसको बुकिङ लिन शुरु गरेको छ । सो स्कुटरको मूल्य ३ लाख ३० हजार रुपैयाँ तोकिएको छ । पहिलो २० ग्राहकलाई २० हजार रुपैयाँ छुट र अन्य विभिन्न अफर सहित सो स्कुटरको बुकिङ खुला गरिएको हो ।

सो स्कुटरको रेटेड पावर ३००० वाट र पिक पावर ५२०० वाट छ । यसमा ६२ भोल्ट ५२ एएचको लिथियम आयोन ब्याट्री रहेको छ । फुल चार्जमा सो ब्याट्रीले १६० किलोमिटर सम्मको रेन्ज दिन्छ । सो ब्याट्री फायरप्रुफ हुनुका साथै वाटरप्रुफ समेत छ । त्यसैगरी स्मार्ट बीएमएस एक्टिभ ब्यालेन्सिङ छ ।

ब्याट्रीलाई एकपटक फुलचार्ज गर्न ४ देखि ५ घण्टा समय लाग्ने र स्कुटरलाई एक पटकको फुल चार्जमा १६० किलोमिटरसम्म गुडाउन सकिने कम्पनीको दावी छ ।

सो स्कुटरमा टिएफटी टच स्क्रिन, दुवै चक्कामा डिस्क ब्रेक, स्टेनलेस स्टिल फ्रेम च्यासिस, दुवै साइडमा फुट रेष्ट, ब्याक गार्ड र फराकिलो वुट स्पेस जस्ता विशेषता उपलब्ध छ ।