अब स्मार्ट लाइसेन्स प्रदेशमै छापिने, विदाका दिन पनि ट्रायल लिइने

काठमाडौं – सवारी साधनका लागि आवश्यक सवारी चालक अनुमतिपत्र (स्मार्ट लाइसेन्स) अब प्रदेश सरकारले नै छाप्ने भएको छ । यसअघि स्मार्ट लाइसेन्स केन्द्रबाट छापिन्थ्यो ।

अब विभिन्न प्रदेशबाटै यस्ता स्मार्ट लाइसेन्स छपाइका लागि तयारी भएको छ । भौतिक पूर्वाधार तथा यातायातमन्त्री मोहम्मद इस्तियाक राईको अध्यक्षतामा सातै प्रदेशका यातायात मन्त्रीको ‘अन्तरतह समन्वय बैठक’ले स्मार्ट लाइसेन्स छपाइका लागि संघीय सरकारले यन्त्र उपलब्ध गराउने र विभिन्न प्रदेशमा छपाइ गर्ने निर्णय गरेको छ । अहिले यातायात व्यवस्था विभागले मात्रै लाइसेन्स छपाइ गर्दै आएको छ ।

यस अनुसार सुदूरपश्चिम र कर्णालीमा एक, गण्डकी र लुम्बिनीमा दुई र प्रदेश १ र मधेस प्रदेशलगायत प्रदेशमा एक÷एक स्थानमा स्मार्ट लाइसेन्स छपाइ तयारी गरिएको हो ।

संघ तथा सातै प्रदेशका मन्त्री ट्रायल पास भएकै दिन ‘परीक्षणकालीन लाइसेन्स’ जारी गर्न पनि सहमत भएका छन् । भौतिक पूर्वाधार तथा यातायात मन्त्रालयले ‘स्मार्ट ड्राइभिङ लाइसेन्स सक्कली वा नक्कली लाइसेन्स रिडिङ’ गर्ने यन्त्र प्रत्येक ट्राफिक प्रहरीका हातमा उपलब्ध गराउने र जरिवाना अनलाइनबाटै तिर्न मिल्ने व्यवस्थापनमा पनि जुटेको छ ।

यता, लाइसेन्सका लागि चाप बढेपछि बाग्मती प्रदेशअन्तर्गतका यातायात व्यवस्था कार्यालयले सार्वजनिक बिदाका दिन पनि ‘ट्रायल परीक्षा’ सुरु गर्ने भएका छन् ।

बाग्मती प्रदेशअन्तर्गत श्रम, रोजगार तथा यातायात मन्त्रालयले परिपत्र गर्दै आवेदक संख्या बढी भएका कार्यालयमा कार्यालय समयअघि बिहान र सार्वजनिक बिदाका दिन पनि ट्रायल गराउन निर्देशन दिएको हो ।

यसैगरी अंकभारका आधारमा परीक्षा लिइने र ७० अंक पाउनेलाई लाइसेन्स दिने तयारी समेत भएको पहिले नै सार्वजनिक भइसकेको छ ।