चन्द्रमा र मंगल ग्रहमा समेत जानेछ रेल : जापानको यस्तो योजना

जापानले चन्द्रमा र मंगल ग्रहमा पृथ्वीजस्तै बस्न मिल्ने वातावरण बनाउने भएको छ । जापानले पृथ्वी, चन्द्रमा र मंगल ग्रहलाई जोड्न अन्तर–ग्रहीय रेल पनि चलाउने योजना बनाएको छ । सो परियोजनाका लागि जापानको क्योटो विश्वविद्यालयका अनुसन्धानकर्ताले काजिमा कन्स्ट्रक्सन कम्पनीसँग सहकार्य गरेका छन् ।

टोलीले पृथ्वी जस्तै वातावरण र गुरुत्वाकर्षण बल प्रयोग हुने ग्लास निर्माण गर्ने योजनाको घोषणा गरेको छ । यसले अन्तरिक्षमा बस्न सजिलो बनाउनेछ । सो गिलास भित्र कृत्रिम गुरुत्वाकर्षण, यातायात सिस्टम, बिरुवा र पानी पनि उपलब्ध हुनेछ ।

यो संरचनालाई चन्द्रमामा ‘लुनाग्लास’ र मंगलमा ‘मार्सग्लास’ भनिनेछ । यस योजना अन्तर्गत प्रोटोटाइप गिलास र अन्तर–ग्रह ट्रेन बनाउन लगभग ३० वर्ष लाग्नेछ । यस गिलासको उचाइ करिब १३०० फिट र रेडियस ३२८ फिट हुनेछ । यो सुरु हुन लगभग १०० वर्ष लाग्नेछ ।

सो अन्तरग्रहीय यातायात सिस्टमलाई हेक्साट्रयाक भनिनेछ । यसले लामो दूरीको यात्रा गर्दा पृथ्वीको सतह जस्तै गुरुत्वाकर्षण सिर्जना गर्नेछ । रेलमा हेक्साक्याप्सुल भनिने हेक्सागोनल आकारको क्याप्सुल र बीचमा चल्ने यन्त्र पनि हुनेछ ।

जापानले पृथ्वीबाट चन्द्रमामा जान र अर्को पृथ्वीबाट मंगल ग्रहमा जानका लागि २ प्रकारका क्याप्सुल बनाउनेछ । चन्द्र क्याप्सुलको रेडियस १५ मिटर हुनेछ भने मंगल ग्रहमा जाने क्याप्सुलको रेडियस ३० मिटर हुनेछ ।

चन्द्रमामा रहेको स्टेशनले गेटवे उपग्रह प्रयोग गर्नेछ र यसलाई चन्द्र स्टेशनको रूपमा चिनिनेछ भने मंगल ग्रहमा रहेको रेलवे स्टेशनलाई मार्स स्टेशन भनिनेछ । यो मंगल ग्रहको उपग्रह फोबोसमा अवस्थित हुनेछ । मानव अन्तरिक्ष विज्ञान केन्द्रका अनुसार पृथ्वी स्टेशनलाई टेरा स्टेशन भनिनेछ ।