अब एस–क्रस बजारमा नआउने, टोयोटा र मारुतीले संयुक्त रुपमा ल्याउदै एसयूभी भिटारा

मारुती सुजुकी इन्डियाले एस–क्रस एसयूभीको उत्पादन बन्द गरेको छ । यद्यपि कम्पनीले यसको अन्तिम स्टक रहेसम्म बिक्री जारी राख्नेछ । अब एस–क्रसको म्यानुअल भेरिएन्ट मात्र खरिद गर्न सकिनेछ, तर यसको पनि सीमित स्टक मात्र उपलब्ध छ ।

अब यसको स्थानमा भिटारा उपलब्ध हुनेछ । भारतमा केही डिलरशिपले मारुती सुजुकीको आगामी मिड साइज एसयूभी भिटाराका लागि बुकिङ गर्न थालेका छन् । यसलाई टोयोटा र मारुतीले संयुक्त रुपमा तयार पारेका हुन् । कम्पनीले भिटारा ब्रेजा नामबाट ‘भिटारा’ नाम हटाएर ब्रेजा हालै सार्वजनिक गरेको छ भने अर्को एसयूभी भिटारा हुनेछ ।

आगामी मारुती सुजुकी भिटारा जुलाई २० मा लन्च गरिनेछ र अगस्टदेखि यसको बिक्री सुरु हुनेछ । लन्चिङ पछि भिटारा भारतमा मारुतीको सबैभन्दा महँगो कार हुनेछ र यसले हुन्डाई क्रेटा, किया सेल्टोस, निसान किक्स, स्कोडा कुशाक र फक्सवागन टाइगुनलाई टक्कर दिनेछ ।

मारुती सुजुकी भिटारामा १.५ लिटर हाइब्रिड इन्जिन हुनेछ । जसले ११३ बीएचपीको पावर र १४१ एनएमको टर्क जेनेरेट गर्नेछ । सो इन्जिनलाई अटोमेटिक गियरबक्ससँग जोडिनेछ । यसको मोटरलाई ११७.६भी लिथियम–आयोन ब्याट्रीमा जोडिने सम्भावना छ । सो एसयूभी टोयोटाको आगामी अर्बन क्रुजर हाइराइडरकै प्लेटफर्ममा आधारित हुनेछ । यसको केही डिजाइन, बडी प्यानल र इन्जिन पनि समान हुनेछ ।

एस–क्रस सन् २०१५ मा लन्च गर्दा, यो सबैभन्दा महँगो मारुती सुजुकी कार थियो र नेक्सा डिलरशिप मार्फत बिक्री हुने पहिलो कार थियो । यसको राम्रो बिक्री नहुनुको एउटा कारण यसको मूल्य थियो । एस–क्रस २ डिजेल इन्जिन विकल्पमा उपलब्ध थियो । खराब बिक्रीको कारण मारुतीले १.६ लिटर इन्जिन बन्द गर्नु परेको थियो ।