नागरिक एपमा अब ड्राइभिङ लाइसेन्स लिंक गर्न सकिने

काठमाडौं – नागरिक एपमा नयाँ अपडेट गरिएसँगै प्रयोगकर्ताले आफ्नो ड्राइभिङ लाइसेन्स लिंक गरी हेर्न सकिने सुविधा थप भएको छ । एपको पछिल्लो भर्सन १.५.४ सँगै लाइसेन्स लिंक गर्ने सुविधा थपिएको हो ।

यातायात व्यवस्था विभागका इन्जिनियर सन्तोष पोखरेल र चेक इन्टरनेसनलको प्रयासमा ड्राइभिङ लाइसेन्सलाई नागरिक एपमा जोडिएको हो ।

यद्यपि एपको अपडेटमा बग देखिएकाले पुनः अपडेट पठाइएको र उक्त अपडेट आएसँगै फोटो सहितको ड्राइभिङ लाइसेन्स देखिने नागरिक एपले जनाएको छ ।

एन्ड्रोइडमा नागरिक एपको पछिल्लो अपडेट आए पनि आईओएसमा उक्त अपडेट उपलब्ध हुन केही दिन लाग्नसक्ने अनुमान गरिएको छ ।

नागरिक एपमा सम्भव भए सम्मका सबै सरकारी सुविधा उपलब्ध गराउने योजना अनुसार विभिन्न सुविधा क्रमशः थप हुँदै गएका छन् ।