टाटा बन्यो दोस्रो ठूलो कार कम्पनी

टाटा मोटर्स भारतको दोस्रो ठूलो अटो कम्पनी बनेको छ । हुन्डाईलाई पछि पार्दै टाटाले यो उपाधि जितेको हो । टाटा मोटर्सले गत महिना ४३ हजार ३४१ युनिट कार बिक्री गरेको थियो भने हुन्डाईको बिक्री ४२ हजार २९३ थियो ।

टाटा मोटर्सले लगातार दोस्रो पटक ६ महिनामा हुन्डाई मोटर्सलाई पछि पारेको छ । डिसेम्बर २०२१ मा हुन्डाईले कम बिक्री गरी शीर्ष १० कार निर्माताको सूचीमा ३ नम्बरमा झरेको थियो । अहिले फेरि टाटा मोटर्सले मे महिनामा हुन्डाई भन्दा १ हजार ४८ युनिट बढी कार बिक्री गरेको छ ।

हुन्डाई मोटर कम्पनीले मे २०२२ मा घरेलु बजारमा ४२ हजार २९३ कार र एसयूभी बिक्री गरेको छ, जुन वार्षिक रूपमा ६९.१७ प्रतिशतले वृद्धि भएको छ । सोही महिनामा कम्पनीको निर्यात ५७.३१ प्रतिशतले बढेर ८ हजार ९७० युनिट पुगेको छ । कम्पनीले मे २०२२ मा कुल ५१ हजार २६३ युनिट बिक्री दर्ता गरेको छ, जसमा वार्षिक रूपमा बिक्रीमा ६६.९६ प्रतिशतले वृद्धि भएको छ ।

टाटा मोटर्सले मे २०२२ मा प्यासेन्जर भेइकल सेग्मेन्टमा ४३ हजार ३४१ युनिट कार बिक्री ग¥यो, जसमा वार्षिक रूपमा १८५% बिक्री वृद्धि भएको थियो । कम्पनीले गत वर्षको सोही महिनामा १५ हजार १८१ कार बिक्री गरेको थियो । कम्पनीले सन् २०२२ को मे महिनामा ३९ हजार ८८७ आईसीई यात्रुवाहक सवारीसाधन बिक्री गरेको थियो । कम्पनीले ३ हजार ४५४ युनिट इलेक्ट्रिक सवारी साधन बिक्री गरी ६२६ प्रतिशतले वृद्धि गरेको छ ।

पहिलो नम्बरमा भने सधै नै मारुती सुजुकी रहदै आएको छ । मारुती सुजुकीले मे महिनामा कुल १ लाख ६१ हजार ४१३ कार बिक्री गरेको छ, जसमध्ये घरेलु बजारमा मात्रै १ लाख २८ हजार कार बिक्री गरेको दाबी गरिएको छ ।