३ लाख युनिट बिक्री भयो हुन्डाईको लोकप्रिय सब–कम्प्याक्ट एसयूभी भेन्यु

हुन्डाईको लोकप्रिय सब–कम्प्याक्ट एसयूभी भेन्यु सन् २०१९ मा लन्च भएदेखि भारतमा ३ लाखभन्दा बढी युनिट बिक्री भएको छ । यो भन्दा पहिले सन् २०२० जुन सम्ममा १ लाख भेन्यु बिक्री गरी कम्पनीले कोसेढुङ्गा पार गरेको थियो ।

हुन्डाई भेन्युको साइज अलिकति सानो छ, जसको कारण यो मुख्यतया दैनिक रूपमा सहरको सीमाभित्र कार चलाउने ग्राहकमाझ लोकप्रिय बनेको छ । कम्पनीले हुन्डाई भेन्यु पेट्रोल र डिजेल इन्जिन दुवै विकल्पसहित लन्च गरेको छ ।

हुन्डाई भेन्यु ४ भेरिएन्ट ई, एस, एसएक्स र एसएक्स (ओ) र १३ मोडेलमा लन्च गरिएको थियो । सो एसयूभी ६ स्पिड म्यानुअल गियरबक्स र ७ स्पिड डबल क्लच ट्रान्समिसन विकल्पमा उपलब्ध छ । साथै यसमा सेमी अटोमेटिक ट्रान्समिसनको विकल्प पनि थपिएको छ । नेपाली बजारमा यसको बेस भेरिएन्टको मूल्य ३७ लाख ९६ हजार छ भने सबैभन्दा शीर्ष भेरिएन्टको मूल्य ५१ लाख ९६ हजार रुपैयाँ छ ।

हुन्डाई भेन्युको क्याबिनमा धेरै एड्भान्स फिचर जडान गरिएको छ । यसमा ८ इन्चको टचस्क्रिन इन्फोटेनमेन्ट सिस्टम, एप्पल कारप्ले र एन्ड्रोइड अटो, रियर एसी भेन्ट्स, एयर प्युरिफिकेशन सिस्टम, सनरुफ जस्ता फिचरले सुसज्जित छ ।