चांगन अटोले ५ नयाँ विद्युतीय गाडी ‘दिपल’ ब्रान्ड अन्तर्गत सार्वजनिक गर्ने

चांगन अटोको हालै सम्पन्न विश्वव्यापी साझेदारी सम्मेलनमा नयाँ उर्जा क्षेत्रको विश्लेषण र नयाँ विद्युतीय ब्रान्ड ‘दिपल’ लाई सार्वजनिक गरिएको छ । यसले बढ्दो विद्युतीय उपभोक्तालाई आकर्षित गर्ने विश्वास लिइएको छ । २१ वटा नयाँ उत्पादन मध्ये ५ वटा दिपल ब्रान्ड अन्तर्गत सार्वजनिक गरिने बताइएको छ ।

चांगन अटोले २०२७ सम्म कार्बन पिकिङ हासिल गर्ने लक्ष्य लिएको छ भने कार्बन न्युट्रालिटिी २०५० सम्मको लक्ष्य राखिएको जानकारी गराएको छ । यस लक्ष्य हासिल गर्न चांगन अटो केही क्षेत्रमा केन्द्रित रहेको बताइएको छ ।

पहिलो भनेको विद्युतीय डिजिटल ब्रान्ड ‘दिपल’ लाई सार्वजनिक गर्नु हो । दिपलले अभटार ११ पछिको निरन्तरतालाई कायम गर्ने छ जुन हुवावे र सिएटिलसँगको सहकार्यमा सफलतापूर्वक सार्वजनिक भएको थियो । कम्पनीले ठुलो मात्रामा पहिलो हाइड्रोजन फ्युल सेल सेडान पनि चीनमा उत्पादन गर्ने योजना रहको बताएको छ ।

यसका साथसाथै कम्पनीले थोरै हाइड्रोजन खपतमा उच्च सुरक्षा, उच्च विश्वसनियताका साथ विविध परिदृश्यमा कार्बन खपत कम गर्ने उत्पादनमा लक्षित हुने जनाएको छ ।

चांगन अटोका सवारी साधन नेपाली बजारमा पनि उपलब्ध छन् । हाल एमएडब्लु वृद्धि कमर्सियल भेइकल्स प्रालिले चांगनका सवारी साधन बिक्री–वितरण गरिरहेको छ । दिपल ब्रान्डका इलेक्ट्रिक सवारी साधन उत्पादन भएमा भविष्यमा नेपाली बजारमा समेत यी सवारी साधन उपलब्ध हुने अनुमान गर्न सकिन्छ ।