भारतमा हुन्डाईको बिक्रीलाई पछ्याउँदै टाटा, नेपालको अबस्था के ?

टाटा मोटर्सले आफ्नो कारको बिक्रीलाई हुन्डाई मोटर्सको नजिक पुर्याएको छ । अप्रिल महिनामा भारतमा यी दुई ब्रान्डले बिक्री गरेको कुल कारको संख्यालाई आधार मन्दा हुन्डाई जम्मा २५ सय युनिटले मात्र अगाडी रहेको देखिन्छ । उक्त महिना हुन्डाइले कुल ४४ हजार युनिट कार बिक्री गर्दा टाटाले ४१ हजार ५ सय भन्दा केही बढी मात्र बिक्री गरेको थियो ।

मार्च महिनामा कुल ४४ हजार ६ सय युनिट कार बिक्री गरेको हुन्डाईको उक्त महिना झन्डै १ प्रतिशतले कम कार बिक्री भएको हो । यसैगरी अघिल्लो बर्षको अप्रिल महिनाको तुलनामा भने यो दर १० प्रतिशतले कम रहेको छ । अघिल्लो बर्षको सोही महिना उसले कुल ४९ हजार युनिट कार भारतमा विक्री गरेको थियो । विश्वव्यापी सेमिकन्डक्टर अभावसंग जुधिरहेको हुन्डाईको बिक्री आगामी महिनाहरुमा समेत कम हुने आँकलन गरिएको छ । क्रेटा, भेन्यू, आई२० र औरा सेडान भारतमा सर्बाधिक बिक्री हुने हुन्डाइका मोडल हुन् ।

उता टाटा मोटर्सले भने अघिल्लो वर्षको सोही महिनाको तुलनामा ६६ प्रतिशतले बिक्री बढाएको छ । अघिल्लो वर्षको अप्रिल महिनामा टाटाले कुल २५ हजार ९५ युनिट कार बिक्री गरेकोमा यो वर्षको सोही महिनामा बिक्री बढाएर ४१ हजार ५ सय भन्दा बढी पुर्याएको हो । मार्च महिनमा उसले ४२ हजार ३ सय युनिट कार बिक्री गरेको थियो । जुन अप्रिल महिनाको तुलनामा ८ सय युनिटले बढी हो । उक्त महिना बिक्री भएको कुल कारमध्ये टाटाको २ हजार ३ सय युनिट इलेक्ट्रिक कार बिक्री भएका थिए ।

नेपाली बजारमा समेत यी दुई ब्रान्डविच प्रतिस्पर्धा वढिरहेको छ । यद्यपी हालसम्म बिक्रीका हिसावले हुन्डाई टाटा भन्दा निकै अगाडी रहेको देख्न सकिन्छ । हुन्डाइको सर्बाधिक बिक्रि हुने मिडसाइज एसयुभी क्रेटाको प्रतिस्पर्धी टाटासंग नभएको र क्रसओभर सेग्मेन्टमा पनि नेक्नसनको बिक्रीलाई भेन्यूले पछि पारेका कारण हुन्डाईको हिस्सा टाटाको तुलनामा निकै माथी रहेको छ ।

इलेक्ट्रिकमा भने टाटा नेक्सन र टिगोरको माग अत्याधिक रहेपनि आपूर्तीमा देखिएको समस्याका कारण यी दुई कार भनेजति संख्यामा उपलब्ध हुन सकिरहेका छैनन् । जसको सिधा असर टाटाको बृद्धिदरमा देखिएको छ ।