इभीका लागी आवश्यक कम्पोनेन्ट भारतमै उत्पादन गर्ने टोयोटाको योजना

जापनिज अटो निर्माता टोयोटाले इभीका लागी आवश्यक कम्पानेन्टको उत्पादन भारतमै गर्ने योजना बनाएको छ । टोयोटा ग्रुप अन्तर्गतकै टोयोटा किर्लोस्कर अटो पार्ट्ससंगको सहकार्यमा उसले ४८ अर्व भारु लगानी गर्न लागेको जनाइको छ । जसमध्ये टोयोटाले ४१ अर्व र टोयोटा किर्लोस्कर अटो पाटर््सले ७ अर्व लागानी गर्ने सहमती गरेर कर्नाटक सरकारसंग सम्झौता समेत भैसकेको छ ।

टोयोटाले विगत २५ वर्षदेखी भारतीय बजारमा उपस्थिती जनाउँदै आइरहेको छ । पावरट्रेन पार्टस् र इभी कम्पोनेन्ट उत्पादनक लागी उसले कर्नाटकमा रहेको हालको प्लान्टलाई प्रयोगमा ल्याउने जनाइएको छ । यसरी उत्पादन हुने कम्पोनेन्टलाई भारतमा उत्पादन हुने सवारीसाधनमा प्रयोग गर्नुको साथै अन्तराष्ट्रिय बजारमा समेत निर्यात गर्ने उसको योजना छ ।

इलेक्ट्रिक भेहिकलको माग विश्वव्यापी रुपमा बढिरहेको अवस्थामा विश्वकै सबैभन्दा ठूलो अटो उत्पादक टोयोटाले लिएको यो निर्णयलाई अन्य प्रतिस्पर्धी ब्रान्डले समेत अर्थपूर्ण रुपमा लिएका छन् । विश्वकै चौथो ठूलो अटो बजार भारतमा ठूलो लगानी लगाएर इभी कम्पोनेन्ट उत्पादन गर्ने योजना बनाएको यो ब्रान्डले भारतमा यसअघि १ खर्व २० अर्व भारु हाराहारी लगानी गरिसकेको छ ।