हिरो इलेक्ट्रिकलाई उछिन्दै ओला बन्यो सर्बाधिक बिक्री हुने इलेक्ट्रिक स्कुटर

हिरो इलेक्ट्रिकलाई उछिन्दै ओला भारतको नम्वर वान इलेक्ट्रिक स्कुटर व्रान्ड वनेको छ । अप्रिल महिनामा ओलाले कुल १२ हजार ६ सय ७९ युनिट स्कुटर बिक्री गर्दा हिरो इलेक्ट्रिकको बिक्री ६ हजार ५ सय ७१ युनिटमा सिमित भएको थियो । उक्त महिना हिरो इलेक्ट्रिकको भन्दा झन्डै दोव्वले बिक्री बढाएको ओला आधुनिक फिचर्सयुक्त स्कुटरको निर्माणका कारण लोकप्रिय वनिरहेको छ ।

ओलाले शोरुम विनानै अनलाइन प्लेटफर्ममार्फत स्कुटरको वुकिङ लिएर ग्राहकको घरमै डेलिभरी दिँदै आइरहेको छ । केही समय अघिमात्र यो व्रान्डको एक स्कुटरमा आगालागी भएको थियो । उक्त घटनापछि यो स्कुटरमा प्रयोग गरिएको व्याट्रीको गुणस्तरका विषयमा नकरात्मक टिकाटिप्पणी भैरहेको छ ।

यसको साथै बुकिङ गरेको निकै ढिलो समयमा मात्र डेलिभरी गर्ने गरेको आरोप समेत यो ब्रान्डमाथि लाग्ने गरेको छ । आगालागिको घटनापछि कम्पनीले १ हजार ४ सय ४१ युनिट एस१ प्रो मोडललाई बजारबाट फिर्ता लिएर परिक्षण गरिरहेको छ ।

उता चिप अभावको समस्या झेलिरहेको हिरो इलेक्ट्रिकले भने अप्रिल महिनामा कुनैपनि युनिट उत्पादन गर्न नसकेको जनाइएको छ । चीप अभावको वैकल्पिक समाधान खोजिसकेका कारण छिट्टै उत्पादन सुचारु हुने र बजारमा पुन दमदार पुनरागमन जनाउने उसले बताएको छ ।