१२० किलोमिटर रेन्ज भएको नयाँ इलेक्ट्रिक बाइकको उत्पादन प्रारम्भ

टोर्क मोटर्स कम्पनीले टोर्क क्रेटोस इलेक्ट्रिक बाइकको पहिलो युनिट उत्पादन गरेको घोषणा गरिएको छ । कम्पनीले आधिकारिक रूपमा नयाँ इलेक्ट्रिक बाइकको डेलिभरी अप्रिल २०२२ मा सुरु हुने घोषणा गरेको छ ।

कम्पनीले सो बाइक जनवरी २०२२ मा २ भेरिएन्ट क्राटोस र क्राटोस आर लन्च गरेको थियो । क्राटोसको मूल्य १ लाख ८ हजार भारु र क्राटोस आरको मूल्य १ लाख २३ हजार भारु तोकिएको छ ।

क्राटोस इलेक्ट्रिक बाइकमा ४८ भोल्टको सिस्टम भोल्टेजको साथ आईपी६७–रेट गरिएको ४ केडब्ल्युएच लिथियम आयोन ब्याट्री प्याक उपलब्ध छ । यसको आईडीसी रेन्ज १८० किलोमिटर र रियल वल्र्ड रेन्ज १२० किलोमिटर रहेको छ । यो बाइकको टप स्पिड १०० किलोमिटर प्रतिघन्टा छ र यसले अधिकतम पावर ७.५ किलोवाट र अधिकतम टर्क २८ एनएम रहेको छ ।

सो बाइकले ४ सेकेण्डमा ० देखि ४० किलोमिटर प्रतिघन्टाको गति हासिल गर्ने कम्पनीको दाबी छ । हाई–स्पेक क्राटोस आरमा ९.० केडब्ल्यु पावर र ३८ एनएमको टर्क जेनेरेट गर्छ । यसको स्ट्यान्डर्ड मोडलको तुलनामा यसको टप स्पिड १०५ किलोमिटर प्रति घन्टा रहेको छ ।

क्राटोस फास्ट चार्जिङ सिस्टमको साथ उपलब्ध छ, जसको ब्याट्रीलाई एक घन्टामा ० देखि ८० प्रतिशतसम्म चार्ज गर्न सकिन्छ । तर, फास्ट चार्जिङ क्राटोस आरमा मात्र उपलब्ध छ । यसमा जिओफेन्सिङ, फाइन्ड माई भेहिकल फिचर, मोटरवाक असिस्ट, क्रयास अलर्ट, भ्याकेसन मोड, ट्रयाक मोड एनालिसिस र स्मार्ट चार्ज एनालिसिस जस्ता फिचर उपलब्ध छ ।

यसबाहेक, बाइकमा कम्पनीको आफ्नै अपरेटिङ सिस्टम छ, जसको नाम टर्क इन्ट्युटिभ रेस्पोन्स अपरेटिङ सिस्टम राखिएको छ । सो सिस्टमले प्रत्येक सवारीको लागि डाटा सङ्कलन र विश्लेषण गर्छ । बाइकमा ४.३ इन्चको टीएफटी स्क्रिन, एप र क्लाउड कनेक्टिभिटीको साथै एन्टि थेफ्ट जस्ता फिचरहरु छन् ।