गाडी किन्नेलाई यो बर्ष छैन नयाँ बर्षको उपहार

यसपटकको नयाँ बर्षमा नयाँ गाडी किन्न चाहने ग्राहकले कुनैपनि अफर र स्किम नपाउने संभावना बढेको छ । नयाँ बर्ष आउन जम्मा ९ दिनमात्र वाँकी हुदा हालसम्म कुनैपनि गाडी कम्पनीले नयाँ बर्ष अफर सार्बजनिक नगरेका कारण यस्तो संभावना बढेको हो । अघिल्ला बर्षहरुमा प्राय कम्पनीले चैत्र १५ गतेभित्रै नयाँ बर्षलाई लक्षित गरी बिभिन्न स्किम र अफरहरु सार्बजनिक गर्ने गर्थे । तर यसपाली रेनोले बाहेक अन्य कम्पनीले नयाँ बर्ष अफर ल्याएका छैनन् ।

अटो लोनमा गरिएको कडाई, उच्च ब्याजदर र गाडी आयतमा ५० प्रतिशत नगद मार्जिनको व्यवस्थाका कारण अहिले गाडीको कारोबार निकै शुस्त वनिरहेको छ । गाडी आयतमा कडाई गर्न भन्दै राष्ट्र वैंकले ल्याएको ५० प्रतिशत नगद मार्जिनका कारण अधिकांश आयतकर्ता कम्पनीले ठूलो भोल्युममा गाडी मगाउन छाडीसकेका छन् ।

बजारमा माग भएको र अग्रिम बुकिङ लिने ग्राहकलाई मात्र गाडी दिने गरी उनीहरुले सिमित मोडलका गाडी आयत गरिरहेका छन् । नयाँ गाडी किन्न बैंकहरुले कर्जा दिन सकिरहेको छैन । यस्तो अबस्थामा सवारीसाधनको मूख्य सिजन प्रभाबित हुने चिन्तामा अधिकांश आयतकर्ताहरु देखिन्छन् । त्यसैले पनि उनीहरुले यो वर्ष कुनैपनि अफर र स्किम ल्याउन रुची नदेखाएको सहजै अनुमान लगाउन सकिन्छ ।

बिगतका बर्षहरुमा हुन्डाई, मारुती सुजुकी, टाटा, फोर्ड, स्कोडा, होन्डा, किया, फक्सवागन र रेनो लगायत कम्पनीहरु बिच कसले पहिला अफर ल्याउने भनेर होडबाजी नै चल्ने गरेको थियो । तर यसपाली रेनो बाहेक अन्य कम्पनीले नयाँ स्किम र अफर ल्याउने छाँटकाँट देखाएका छैनन् । ‘यो बर्ष बजारमा कुनै उत्साह नरहेको कारण हामीले कुनै पनि स्किम र अफर नल्याउने निर्णय लिएका छौ’ एक कम्पनीका प्रतिनिधीले नेपाल अटोसंग भने । उनका अनुसार अघिल्ला वर्षहरुमा ग्राहकले भरिभराउ हुने शोरुमहरु अहिले प्राय सुनसानको अबस्थामा रहेको छ ।

गाडी बिक्रेताहरुले अफर ल्याउन रुची नदेखाएपनि नेपालमा कारोबार हुने केही ठूला टु ह्विलर ब्रान्डले भने नयाँ स्किम ल्याएका छन् । टु ह्विलरमा हालसम्म, बजाज, टिभिएस, यामाहा, बेनेली, बिएमडब्लु, सुजुकी र मोटरहेडले नयाँ बर्ष अफर ल्याएका हुन् । हिरो, होन्डा र अन्य थप केही ब्रान्डले पनि अवको केही दिनभित्र नयाँ अफर ल्याउने बुझिएको छ ।