परीक्षणको क्रममा यस्तो देखियो इलेक्ट्रिक कार रेनो क्विड

यो वर्ष धेरै कार कम्पनीहरूले इलेक्ट्रिक कार सेग्मेन्टमा प्रवेश गर्ने तयारी गरिरहेका छन् । रेनोले यो वर्ष आफ्नो लोकप्रिय ह्याचब्याक क्विडको इलेक्ट्रिक भेरिएन्ट रेनो क्विड इलेक्ट्रिक लन्च गर्ने सम्भावना रहेको छ ।

सो इलेक्ट्रिक कार हालै ब्राजिलमा परीक्षणको समयमा देखिएको छ । हाल बजारमा उपलब्ध रेनो क्विड भन्दा यसमा केही कस्मेटिक परिवर्तन गरिएको देख्न सकिन्छ । यो कार दक्षिण अमेरिकी बजारमा छिट्टै लन्च हुने सम्भावना छ ।

गत वर्ष, रेनो क्विड इलेक्ट्रिकले युरोपेली देशहरूमा डेसिया स्प्रिङ ईभीको नामबाट विश्वव्यापी रूपमा डेब्यु गरेको थियो । केही देशहरूमा यसलाई क्विड ई–टेकको नाममा प्रस्तुत गरिएको छ । चीनमा यो सिटी के–जेडईको नामले बिक्री भइरहेको छ ।

गत वर्ष रेनो क्विड इलेक्ट्रिकको युरोपेली एनक्यापमा सेफ्टी परीक्षण गरिएको थियो, जसमा इलेक्ट्रिक ह्याचब्याकले १ स्टार मात्र पाएको थियो । मिडिया रिपोर्टका अनुसार रेनोले सो कार भारतीय बजारमा पनि लन्च गर्ने भएको छ । यद्यपि रेनो इण्डियाले क्विड इलेक्ट्रिकको बारेमा अहिलेसम्म कुनै आधिकारिक जानकारी दिएको छैन । नेपालमा पनि भविष्यमा आउन सक्छ ।

रेनो क्विड इलेक्ट्रिकमा २६.८ केडब्ल्युएचको ब्याट्री प्याक जडान गरिएको छ, जसको रेन्ज २९० किलोमिटर प्रतिघन्टा हुन सक्छ । यो इलेक्ट्रिक कारले ४४ बीएचपी पावर र १२५ एनएम टर्क जेनेरेट गर्छ । रेनो क्विड इलेक्ट्रिकको टप स्पिड १२५ किलोमिटर प्रतिघन्टा हुनेछ ।

सो कार डिसी फास्ट चार्जरको मदतले मात्र आधा घन्टामा ८० प्रतिशतसम्म चार्ज गर्न सकिन्छ ।