नयाँ डर्ट बाइकको बिक्री शुरु हुँदै, ३०० सिसीमा पहिलो डर्ट बाइक हुने कम्पनीको भनाई

नयाँ बर्षको सुरुवातसंगै नेपाली बजारमा अर्को नयाँ ब्रान्डको डर्ट वाइक भित्रिने भएको छ । -याप्टर ब्रान्डको यो मोटरसाइकललाई बिक्रेता कम्पनी एड्भेन्चर ह्विल्सले नेपालमै एसेम्वल गरी बिक्री गर्न लागेको हो ।

३०० सय सिसी क्षमतामा उपलब्ध हुने यी बाइक एल, आर र आरआर मोडलमा उपलब्ध हुने कम्पनीका संचालक उज्वल जिसीले बताएका छन् । उनका अनुसार यी वाइकमा पावरफुल इन्जिन जडान गरिनेछ । ‘हामीले ३ वर्ष लगाएर चाइनिज कम्पनीसंगको सहकार्यमा बिशेष प्रकारको इन्जिन विकास गरेका छौ । जुन यी नयाँ बाइकमा जडान गरिनेछ’ उनले भने ।

यी नयाँ बाइकलाई नेपालको बाटो सुहाँउदो हुने गरी विशेष प्रकारले डिजाइन गरिएको उनले बताए । उनी भन्छन्, ‘हाल बजारमा २५० सिसी सम्मका डर्ट बाइक मात्र उपलब्ध रहँदै आएका कारण हामीले ठूलो इन्जिन राखेर यो बाइक लन्च गर्न लागेका हौ । यो नेपाली बजारमा उपलब्ध ३ सय सिसी क्षमताका एकमात्र डर्ट बाइक हुनेछ । जसको पावर र टर्क समेत उच्च रहनेछ ।’

यी बाइकको मूल्य ७ लाख रुपैयाँदेखी शुरु हुनेछ । बाइकको तौल कम गर्न यसको च्यासिसमा गुणस्तरिय स्टिलको प्रयोग गरिएको छ । यी बाइकमा ह्वाइट पावर सस्पेन्स प्रयोग हुने र यो अफरोडका लागी एकदमै उपयोगी हुने बताइएको छ । लामो राइडमा जाने राइडरका लागि १४ लिटरको फ्युल ट्यांक अप्सनका रुपमा उपलब्ध हुने र डबल एक्जस्ट समेत अप्सनमा रहनेछ ।