अव सुजुकीले पनि उड्ने कार वनाउने, स्काई ड्राइभसंग गर्यो सम्झौता

जापनिज अटो निर्माता सुजुकीले उड्ने कारको विकास गर्न स्काई ड्राइभसंग सम्झौता गरेको छ । सन् २०१८ देखी उड्ने कार र कार्गो ड्रोनको बिकासमा सक्रिय जापनिज कम्पनी स्काई ड्राइभसंगको साझेदारीसंगै यी दुई कम्पनीले संयुक्त रुपमा खोज तथा अनुसन्धान गर्ने जनाइएको छ । स्काई ड्राइभले हाल जापनमा कार्गो ड्रोनको उत्पादन गरी संचालनमा ल्याइसकेको छ भने २ सिट क्षमताको उड्ने कारलाई बजार ल्याउने अन्तिम तयारी गरिरहेको छ ।

सन् २०२५ मा ओशका शहरमा हुन गैरहेको वल्र्ड एक्स्पोको अबसर पारेर उड्ने ट्याक्सी सेवा सुचारु गर्ने स्काई ड्राइभले योजना बनाएको छ । सुजुकीसंगको सहकार्यले भोलिका दिनमा नयाँ प्रबिधीको विकास र हाल उत्पादनको क्रमममा रहेको उड्ने कारको नयाँ बजार पत्ता लगाउन थप सहयोग पुग्ने यो कम्पनीले विश्वास लिएको छ ।

सुजुकीले भने यस्तो कारको सुरुवाती विकासलाई भारतमा केन्द्रित गर्ने योजना बनाएको छ । प्यासेन्जर कार, मोटरसाइकल र आउटडोर मोटरको उत्पादनमा केन्द्रित रहँदै आएको सुजुकीका लागि यो सम्झौतासंगै अटोमोबाइल क्षेत्रमा अर्को सेग्मेन्ट थप भएको छ ।

इलेक्ट्रिक भेहिकलको उत्पादनमा समेत आक्रमक भएर आउने तयारी गरिरहेको सुजुकीले यो क्षेत्रमा १० हजार करोड भन्दा बढी भारतीय रुपैयाँ लगानी गर्ने घोषणा हालसालै गरेको थियो ।