बजाज र टीभीएससँग प्रतिस्पर्धा गर्न सुजुकीले नयाँ ई–स्कुटर लन्च गर्ने

सुजुकीले पनि इलेक्ट्रिक स्कुटरमा ध्यान केन्द्रित भइरहेको छ । सुजुकीले भारतीय बजारमा नयाँ इलेक्ट्रिक स्कुटर ल्याउने तयारी गरिरहेको छ । सुजुकी पनि इलेक्ट्रिक स्कुटरमा सबैभन्दा बढी ध्यान केन्द्रित गर्ने ब्रान्डहरू मध्ये एक हो ।

सुजुकीको आगामी इलेक्ट्रिक स्कुटर हालै परीक्षणको क्रममा देखिएको छ । रिपोर्टका अनुसार यो इलेक्ट्रिक स्कुटर वर्गम्यान १२५ को इलेक्ट्रिक भर्सन हुनेछ । वर्गम्यान १२५ स्कुटर सुजुकीको उत्कृष्ट उत्पादन मध्ये एक हो ।

सो इलेक्ट्रिक स्कुटर ड्युअल टोन कलर स्किममा लन्च गरिने छ । परीक्षणमा सो स्कुटर नीलो र सेतो रङमा देखिएको छ । यसमा फुटबोर्डको वरिपरि ग्रे स्लिभ, पछाडि ट्विन सक एब्जर्बर र लिथियम–आयोन ब्याट्री प्याक हुने अपेक्षा गरिएको छ ।

सो ई–स्कुटरको बाहिरी भाग बर्गम्यान स्ट्रिट जस्तै देखिन्छ । सो इलेक्ट्रिक स्कुटरमा ब्लुटुथ कनेक्टिभिटी, टर्न–बाई–टर्न नेभिगेसन, युएसबी चार्जर, फुल–एलईडी हेडलाइट र ठूलो सिट स्टोरेज सहितको अपडेटेड डिजिटल इन्स्ट्रयुमेन्ट क्लस्टर जस्ता फिचर हुने अपेक्षा गरिएको छ ।

कम्पनीले यसको पावरट्रेन र अन्य प्राविधिक विवरणहरू खुलासा गरेको छैन, तर बर्गम्यानको इलेक्ट्रिक स्कुटरमा ३–४ केडब्ल्युएच ब्याट्री प्याक र ४–६ केडब्ल्युएच इलेक्ट्रिक मोटर जडान गरिनेछ, जसले एक पटक चार्ज गर्दा करिब ८० देखि ९० किलोमिटरको रेन्ज दिन सक्छ ।

कम्पनीले सो स्कुटरको लन्च मिति पुष्टि गरेको छैन । लन्च गरेपछि यो स्कुटरले बजाज चेतक ईभी, टीभीएस आइक्युब र एथर ४५० एक्ससँग प्रतिस्पर्धा गर्नेछ ।