धुलिखेलमा नेपाल रेसर कपको रौनक : शनिबार फाइनल हुने

काठमाडौं – लकडाउन पश्चात पहिलो पटक धुलिखेलमा बाइक राइडरहरुका लागि आकर्षण मानिने रेसिङ गेम चलिरहेको छ । धुलिखेलको हिमालयन मोटरल्यान्डमा बिहीबार देखि प्रारम्भ भएको नेपाल रेसर कपको फाइनल खेल भोलि शनिबार सम्पन्न हुनेछ ।

नेपाल अटोमोबाइल्स एसोसिएसन (नासा) को सहयोगमा मोटर स्पोर्ट्स नेपालले आयोजना गरेको सो रेसिङमा २२० सीसी सम्मका मोटरसाइकल सहभागी हुने छन् । हिजो भएको खेलमा १५० देखि १८० सीसी सम्मका मोटरसाइकल सहभागी भएका थिए भने आज २०० देखि २२० सीसी सम्मका मोटरसाइकल राइडरहरुले आफ्नो मोटरसाइकल कुदाउने छन् ।

सबै क्याटागोरीको फाइनल भोलि शनिबार हुने मोटर स्पोर्ट्स क्लबका अध्यक्ष विनोद तण्डुकारले बताए ।

नेपाल रेसर कपलाई बेनेली मोटरसाइकलका साथै भिडोल, क्यास्ट्रोल, पेट्रोनस, गल्फलगायतका लुब्रिकेन्ट एवं इक्विपमेन्ट आयातकर्ता हिट्को प्रालिले प्रायोजन गरेका छन् ।