बीवाईडीले ल्याउने नयाँ इलेक्ट्रिक कार ‘बीवाईडी सील’ को तस्बिर सार्वजनिक

बीवाईडीले बजारमा लन्च गर्ने अन्तिम तयारीमा रहेको नयाँ इलेक्ट्रिक कार ‘बीवाईडी सील’ को तस्बिर सार्वजनिक भएको छ । चीनमा प्रत्येक कार निर्माता कम्पनीले नयाँ कार लन्च गर्नु पहिले सरकारी निकायबाट स्वीकृति लिनुपर्छ र यस सम्बन्धी सूची प्रत्येक महिना सार्वजनिक गरिन्छ । सो सूचीमा तस्बिर र बेसिक स्पेक समावेश गरिन्छ । सोही सूचीमा बीवाईडी सील समेत समावेश गरिएको हो ।

चीनको मिनिस्ट्री अफ इन्डष्ट्री एन्ड इन्फर्मेसन टेक्नोलोजीले सार्वजनिक गरेको तस्बिर अनुसार यसको डिजाइन बीवाईडी हान र बीवाईडी डल्फिनबाट प्रभावित भएको देखिन्छ । चाइनिज सञ्चार माध्यमहरुका अनुसार बीवाईडी सील ओसन सिरिजमा आधारित छ र ई–प्लेटफर्म ३.० मा आधारित छ । यही प्लेटफर्म बीवाईडीले पहिलो पटक बीवाईडी डल्फिन र पछि बीवाईडी युआन प्लसमा प्रयोग गरेको छ ।

यो गाडीको हेडलाइट हेर्दा पोर्श टेक्यान जस्तो लाग्छ । यसमा स्ट्रिमलाइन्ड बोनट, पप–आउट डोर ह्यान्डल र एरोडाइनामिक सेप छ ।

यो गाडी विभिन्न ३ भर्सनमा उपलब्ध हुनेछ । सबैभन्दा माथिल्लो भर्सन अल ह्विल ड्राइभमा हुनेछ । यसको फ्रन्टमा एसिंक्रोनस ७५ किलोवाट कन्टिन्युअस र १६० किलोवाट पिक मोटर हुनेछ भने रियरमा परमनेन्ट म्याग्नेट सिंक्रोनस मोटर हुनेछ, जुन ७० किलोवाट कन्टिन्युअस र १५० किलोवाट पिक मोटर हुनेछ । यसको तौल २, १५० किलोग्राम हुनेछ ।

फ्रन्ट मोटरले २१८ एचपी र रियर मोटरले ३१३ एचपी र दुवै मिलेर ५३१ एचपी पावर जेनेरेट गर्छ, जुन निकै नै शक्तिशाली हो ।

चाइनिज बजारमा यसले टेस्ला मोडल ३ सँग प्रतिस्पर्धा गर्ने र आगामी अप्रिलमा हुने बेइजिङ अटो शोमा आधिकारिक रुपमा सार्वजनिक गरिने अनुमान गरिएको छ ।