आकर्षक लुक्स र फिचरका साथ नेपाली बजारमा उपलब्ध इलेक्ट्रिक स्कुटर कोमाकी भेनिस

नेपाली बजारमा हालै भारतीय इलेक्ट्रिक स्कुटर ब्रान्ड कोमाकीका दुई इलेक्ट्रिक स्कुटर भेनिस र एसई भित्रिएका छन् । यी मध्ये कोमाकी भेनिस फुल बडी प्रोटेक्सनका साथ आकर्षक फिचर र कलरले सुसज्जित छ ।

नेपालमा कोमाकीको आधिकारिक वितरकको रुपमा युनिटी ट्रेडिङ कन्सर्नले यो स्कुटर भित्र्याएको हो । केही दिन पश्चात कोमाकी ब्रान्डका स्कुटरको औपचारिक लन्च गरिने बताइएको छ ।

यो स्कुटरलाई शुरुमा चाबीमार्फत अन गर्दा पार्किङ मोडमा हुन्छ । पार्किङ मोड यो स्कुटरका लागि एक प्रकारको सेफ्टी फिचर हो । कहिलेकाहिं एक्सिलरेटमा त्यत्तिकै छोडेको समयमा बालबालिका वा अन्य कोही आएर चलाउन खोजेमा पनि गुड्दैन । यसले गर्दा सुरक्षामा सहजता हुन्छ ।

स्कुटर चलाउनु प-यो भने यसलाई घुमाएर रेडी मोडमा लैजानु पर्छ । त्यसपछि आवश्यकता अनुसार गियर चेन्ज गर्न सकिन्छ । यसलाई १, २ र ३ गरी तीनवटा गियरमा चलाउन सकिन्छ । गियर अनुसार यसको स्पिड पनि बढ्छ ।

१ गियरमा चलाउदा ५५, २ गियरमा चलाउदा ७१ र ३ गियरमा चलाउदा ८० किलोमिटर प्रतिघण्टाको गतिले यसलाई चलाउन सकिन्छ । समग्रमा भन्दा यसले ७० किलोमिटर भन्दा बढी स्पिड दिन्छ ।

त्यसैगरी यसमा स्पोर्ट मोड समेत छ । स्पोर्ड मोड अर्को छुट्टै मोड हो र यसमा स्पिड अनुसारको आफ्नै ३ गियर हुन्छ ।

यसमा रिभर्स मोड पनि छ । आवश्यक परेको समयमा हाइट अलि कम भएकाहरुले यसको प्रयोग गरी स्कुटरलाई रिभर्स गुडाउन पनि सकिन्छ ।

त्यसैगरी पार्किङ लाइट, क्रुज कन्ट्रोल सिस्टम (सीसीएस), रिपेयर स्विच, मोबाइल चार्जिङ पोर्ट, फोन उठाउने तथा काट्ने र भोल्युम कन्ट्रोल गर्ने बटन र ब्लुटुथ, एक्स्ट्रा हर्न आदि आकर्षक फिचरहरु यसमा उपलब्ध छन् ।

कोमाकी भेनिसमा ३ हजार वाटको मोटर छ । ७२ भोल्ट ४० एम्पियर आवरको ब्याट्री छ । ब्याट्रीमा २ वर्षको वारेन्टी छ । लामो समय सम्म स्कुटर प्रयोगमा नआउने कन्डिसन भयो भने ब्याट्रीलाई जोगाएर राख्नका लागि अन्डरसिट स्टोरेजमा एमसीबीको व्यवस्था छ । यसले गर्दा ब्याट्री लेवल घट्दैन । ब्याट्रीलाई ४ घण्टा चार्ज गर्न सकिन्छ ।

हाल ब्याट्री चार्ज गर्नका लागि चार्जिङ पोर्ट प्रयोग गर्न सकिन्छ । ब्याट्री झिकेरै चार्ज गर्ने प्रविधि समेत उपलब्ध छ ।

यो स्कुटरको चारैतिर प्रोटेक्सनको लागि बडीगार्डको व्यवस्था गरिएको छ । त्यसैगरी पछिल्लो भागमा स्टोरेज बक्स छ । पहिलो २० ग्राहकका लागि यो निःशुल्क उपलब्ध हुने र त्यसपछिका ग्राहकले भने आफैले व्यवस्था गर्नु पर्ने कम्पनीको भनाइ छ ।

आधुनिक इलेक्ट्रिक स्कुटरमा हुने रिजेनेरेटिभ फिचर यसमा छ । कुनै जामको समयमा ब्रेक लगाइरहदा चार्ज रिजेनेरेट हुन्छ, जसले गर्दा रेन्ज बढ्छ । यसको ग्राउन्ड क्लियरेन्स १७० एमएम छ । त्यसैगरी यसमा सीबीएस अर्थात कम्बाइन्ड ब्रेकिङ सिस्टम छ ।

यो स्कुटरको मूल्य ३ लाख १० हजार रुपैयाँ तोकिएको छ । यसमा हाल अफरको रुपमा २० हजार रुपैयाँ छुट भएको कम्पनीको भनाइ छ ।