रोयल इन्फिल्ड हन्टरको अर्को स्पाई तस्बिर सार्वजनिक, थप फिचरको भयो खुलासा

रोयल इन्फिल्डले नयाँ मोटरसाइकल ‘हन्टर ३५०’ लन्च गर्ने तयारी गरिरहेको छ । यही वर्ष अर्थात सन् २०२२ भित्रै बजारमा आउने बताइएको सो मोटरसाइकलको स्पाई तस्बिर फेरि सार्वजनिक भएको छ ।

हाल बजारमा प्रचलित मेटियर ३५० भन्दा यो फरक देखिएको छ । यसमा रोड टायर प्रयोग गरिएकोले विशेष गरी हाइवे क्रुजरका लागि बनाइएको जस्तो लाग्छ । तस्बिरमा टेललाइट एसेम्बलीको खुलासा भएको छ । यसमा सानो गोलाकार टेललाइट छ र यो एलईडीयुक्त छ ।

यसको फ्रन्टमा टेलिस्कोपिक फोर्क र पछिल्लो भागमा ट्विन स्प्रिङ सक एब्जर्बरको प्रयोग गरिएको छ । यसमा उही ३४९ सीसी, सिंगल सिलिन्डर इन्जिन मिल्ने सम्भावना छ, जुन मेटियर ३५० मा प्रयोग गरिएको छ । यसले २०.२ बीएचपी पावर र २७ एनएम टर्क जेनेरेट गर्छ । इन्जिनका साथ ५–स्पिड गियरबक्स दिइएको छ ।

यसको दुवै पांग्रामा सिंगल डिस्कको प्रयोग गरिएको छ । त्यसैगरी ड्युअल च्यानल एबीएस पनि मिल्ने सम्भावना छ । पछिल्लो सिटमा बस्ने व्यक्तिलाई आरामदायिता प्रदान गर्न एक पिलर ब्याकरेस्ट पनि हुनेछ ।

यो मोटरसाइकल कहिले लन्च हुन्छ भन्ने वारेमा कम्पनीले आधिकारिक रुपमा केही जानकारी दिएको छैन । यद्यपि आगामी फेस्टिभ सिजन सम्म लन्च हुने अनुमान गरिएको छ ।