अब आईएमईले पनि नेपाली बजारमा इलेक्ट्रिक सवारी ल्याउने

काठमाडौं – नेपाली बजारमा अशोक लेल्यान्ड र एस्कर्ट्सका सवारी साधन बिक्री गर्दै आइरहेको आईएमई ग्रुप अन्तर्गतको आईएमई मोटर्सले अब इलेक्ट्रिक सवारी साधन समेत बिक्री गर्ने भएको छ । आईएमई ग्रुपले यसका लागि छुट्टै आईएमई इलेक्ट्रिक पोर्टफोलियो निर्माण गरेको बताएको छ ।

आईएमई इलेक्ट्रिकले दुई पांग्रे र चार पांग्रे र कमर्सियल इलेक्ट्रिक सवारी साधन नेपाली बजारमा उपलब्ध गराउने छ । पहिलो चरणमा दुई पांग्रे सवारी साधन उपलब्ध गराउने र आगामी मार्चको अन्त्य सम्ममा यी सवारी साधन नेपाली बजारमा उपलब्ध हुनेछन् । आईएमई इलेक्ट्रिकले फरक फरक ब्रान्डका सवारी साधन नेपाली बजारमा उपलब्ध गराउने बताए पनि ब्रान्ड भने अहिले नै खुलाएको छैन ।

नेपाली बजारमा इलेक्ट्रिक सवारी साधनतिरको झुकाव बढ्दै गएको र प्रशस्तै विद्युत उत्पादन हुने भएकाले यस्ता सवारी साधनको भविष्य समेत राम्रो भएको सन्दर्भमा यस्ता सवारी साधन प्रयोगलाई प्रोत्साहन गर्नका लागि आईएमई इलेक्ट्रिकको स्थापना गरिएको कम्पनी स्रोतको भनाइ छ ।