चिनियाँ कम्पनी ग्रेटवालले बनायो सुजुकी जिम्नी जस्तै देखिने नयाँ एसयुभी

अटोमोबाइलका लागी चीन विश्वको सबैभन्दा ठूलो बजार हो । चीनमा हरेक वर्ष सयौं संख्यामा नयाँ गाडीहरु सार्वजनिक हुन्छन् । यसरी सार्बजनिक हुने कतिपय नयाँ कारहरु प्रचलित ब्रान्डको नक्कल गरी निर्माण गरिएको समेत पाइने गरेको छ । जसका कारण चीनियाँ उत्पादकहरुलाई अरुको डिजाइन चोरको आरोप समेत लाग्ने गरेको छ ।

चिनियाँ अटो निर्माताले हालै सुजुकीको निकै लोकप्रिय मिनी एसयूभी सुजुकी जिम्नीको नक्कल गरेको छ । सो कारको निर्माण चीनको अटोमोबाइल ग्रुप ग्रेट वाल मोटर्सले गरेको हो । कारलाई उत्कृष्ट बनाउन चिनियाँ निर्माताले कारको डिजाइनमा केही परिवर्तन गरेको भएता पनि आधारभूत डिजाइन भने सुजुकी जिम्नीको जस्तै छ ।

कम्पनीले हालै चिनियाँ बजारमा आफ्नो मिनी एसयूभी ट्यांक १०० ल्याएको छ जुन ठ्याक्कै सुजुकी जिम्नी जस्तै देखिन्छ । सुजुकी जिम्नी अन्तर्राष्ट्रिय बजारमा निकै लोकप्रिय एसयूभी हो । ट्यांक १०० ३ डोर र ५ डोर भेरिएन्टमा उपलब्ध गराइएको छ । जसको लम्बाई र ह्विलबेस समेत जिम्नीसँग मिल्दोजुल्दो रहेको उल्लेख गरिएको छ।

ट्यांक १०० को फ्रन्टमा कालो मल्टी स्लेटेड ग्रिल समावेश गरिएको छ । यसमा एलईडी हेडलाइटको साथ इन्टिग्रेटेड एलईडी डीआरएल समावेश गरिएको छ । सुजुकी जिम्नीमा जस्तै यस कारमा पनि ठूलो बम्पर जडान गरिएको छ । यसको साथै फग ल्याम्प र बम्परमा दिइएको एयर भेन्ट पनि जिम्नीसँग मिल्दोजुल्दो छ ।

रिपोर्टका अनुसार ट्यांक १०० मा कम्पनीले २.० लिटर, ४–सिलिन्डर टर्बो चार्ज इन्जिन प्रयोग गरेको छ, जसले २२४ बीएचपी पावर र ३८७ एनएम टर्क जेनेरेट गर्छ । सो कार फोर ह्विल ड्राइभ टेक्नोलोजीले सुसज्जित छ र ५ स्पिड अटोमेटिक गियरबक्स दिइएको छ ।

जिम्नीको जापानी भेरिएन्टमा १.५ लिटरको बीबीटी पेट्रोल इन्जिन रहेको छ, जसले १०२ बीएचपी पावर र १३० एनएम टर्क जेनेरेट गर्छ । सो कारमा ५ स्पिड म्यानुअल र ४ स्पिड अटोमेटिक गियरबक्समा उपलब्ध रहेको छ ।

जिम्नी भारतमा समेत लन्च हुने तयारीमा रहेको एसयुभी हो । यसमा१.५ लिटर, ४–सिलिन्डरको पेट्रोल इन्जिन प्रयोग हुनेछ । सो इन्जिन पहिले देखि नै अर्टिगा, सियाज र भिटारा ब्रेजा जस्ता कारहरुमा प्रयोग भैरहेको छ ।