नेपाल भित्रिने तयारीमा फोर्सको नयाँ गोर्खा, माघको दोस्रो साता सम्म नेपालमा लन्च हुने

काठमाडौं – भारतमा धेरै बुकिङ भइरहेको फोर्सको नयाँ गोर्खा एसयूभी नेपाली बजारमा भित्रिने अन्तिम तयारीमा रहेको छ । भारतबाट नेपालका लागि प्रस्थान गरिसकेको फोर्सको नयाँ गोर्खा केही दिन भित्रै नेपाली बजारमा भित्रिने अनुमान गरिएको छ ।

नेपालमा फोर्सको आधिकारिक वितरक आयाम इन्टरकन्टिनेन्टल प्रालिका अनुसार माघको पहिलो साता वा ढिलोमा दोस्रो सातासम्म यसको औपचारिक लन्च गरिने छ । यद्यपि अहिले यसको बुकिङ लिइने र त्यसपछि करिव एक महिना पश्चात मात्र गाडी डेलिभरी गरिने छ ।

तिहार लगत्तै नेपाली बजारमा भित्र्याउने बताइदै आएको फोर्सको नयाँ गोर्खाको माग भारतीय बजारमै अत्यधिक भएकाले नेपाली बजारमा उपलब्ध हुन सकेको छैन ।

फोर्स गोर्खाको माग धेरै भए पनि हालै भारतमा यसको मूल्य समेत वृद्धि गरिएको छ । गत सेप्टेम्बरमा भारतीय बजारमा १३ लाख ५९ हजार भारुका साथ लन्च गरिएको नयाँ बीएस६ इन्जिनमा आधारित फोर्स गोर्खाको मूल्य हालै ५१ हजारले बढाएर १४ लाख १० हजार भारु पु-याइएको छ । नेपाली बजारमा आइपुग्दा फोर्स गोर्खाको मूल्य ७० लाख देखि ७५ लाख रुपैयाँ सम्म हुन सक्ने अनुमान गरिएको छ ।

फोर्स गोर्खा पहिले देखि नै भारतीय र नेपाली बजारमा लोकप्रिय भइरहेको अवस्थामा अहिले यसको नयाँ भर्सन उत्पादन गरिएको हो ।

आइकनिक अफरोडर एड्भेन्चर लाइफस्टाइल एसयूभी गोर्खाको प्रतिस्पर्धा महिन्द्रा थार जस्ता एसयूभीसँग हुनेछ । महिन्द्रा थारसँग प्रतिस्पर्धामा उतार्नका लागि यो सेकेन्ड जेनेरेसन गोर्खामा धेरै परिवर्तन गरिएको छ । 

नयाँ फोर्स गोर्खा धेरै रफ एन्ड टफ स्टाइल, अपडेटेड इन्टेरियर र बीएस६ मापदण्डयुक्त डिजेल इन्जिनका साथ आएको छ । सो एसयूभी ह्वाइट, ग्रे, ग्रिन, ओरेन्ज र रेड कलर अप्सनका साथ उपलब्ध हुनेछ ।

नयाँ फोर्स गोर्खामा बीएस६ इन्जिनयुक्त २.६ लिटर डिजेल इन्जिन दिइएको छ, जसले ८९ बीएचपी पावर र २५० एनएम टर्क जेनेरेट गर्छ । उक्त इन्जिनका साथ हाइड्रोलिक रुपबाट एक्टिभ क्लच र केबल सिफ्टका साथ ५–स्पिड मर्सिडिज जी–२८ गियरबक्स दिइएको छ । सो इन्जिन अल ह्विल ड्राइभ सिस्टम र लो–रेन्ज ट्रान्सफर केसका साथ फ्रन्ट र रियर लकिङ डिफ्रेन्सियलका साथ आउछ ।

एड्भेन्चर शौखिनका लागि यसमा इन्डिपेन्डेन्ट फ्रन्ट सस्पेन्सन र रियरमा रिजिड एक्सल सामेल छ । त्यसैगरी यसमा अफरोडिङ टायर उपलब्ध छ । कम्पनीले यसका डबल हाइड्रोलिक स्प्रिङ क्वाइल सस्पेन्सन र १६ इन्चको ट्युबलेस टायर राखेको छ । यसको चारैतिर अफरोड क्लेडिङ उपलब्ध छ ।

यसको क्याबिनमा एप्पल कारप्ले र एन्ड्रोइड अटो कनेक्टिभिटी तथा नेभिगेसन सपोर्टका लागि टचस्क्रिन इन्फोटेनमेन्ट सिस्टम उपलब्ध छ । यसमा टिल्ट र टेलिस्कोपिक एड्जस्टेबल स्टेयरिङ कोलम, सेन्ट्रल लकिङ, पावर विन्डो, रियर पार्किङ सेन्सर, टायर प्रेसर मोनिटरिङ, भेरिएबल इन्टरमिटेन्ट स्पिड फ्रन्ट वाइपर, कर्नरिङ ल्याम्प, स्पिड सेन्सिङ डोरलक र वाइपरका साथ सिंगल पिस रियर डोर जस्ता फिचरका साथै एक नयाँ ब्ल्याक इन्टेरियर उपलब्ध छ ।