जब महावीर पुनले कार भन्दा सस्तो जेसीबी देखे ……

राष्ट्रिय आविष्कार केन्द्र चलाइरहेका अभियन्ता महावीर पुनको दिमागमा जहिले पनि देश विकास रहेको हुन्छ । यसका लागि अर्थतन्त्र बलियो बनाउनु पर्छ भन्ने उनको मान्यता छ । उनी हरदम नेपाली अर्थतन्त्र बलियो बन्नु पर्छ भन्ने मान्यता राख्छन् ।

नेपाली सडकमा प्रशस्तै कार गुडिरहेका हुन्छन् । ती कारले मानिसलाई एक स्थानबाट अर्को स्थानमा ओसारपसार गर्ने काम मात्र गर्छन् । हामीले नेपाली सडक र विभिन्न औद्योगिक क्षेत्रमा एस्काभेटर, डोजर लगायतका हेभी सवारी साधन पनि देख्छौ । यी हेभी सवारी साधन सडक निर्माण गर्न र विभिन्न औद्योगिक प्रयोजनका लागि उपयोग गरिन्छ ।

यद्यपि यी सवारी साधन कार भन्दा महंगा नहुन पनि सक्छन् । महावीर पुनले पहिलो पटक यस्ता हेभी सवारी साधन देख्दा उनले यसको मूल्य सोधेछन् । अनि उत्तर आयो ९९ लाख । उनलाई के लाग्यो भने ९० लाख भन्दा धेरै महंगो मूल्यका कार पनि नेपाली बजारमा उपलब्ध छन् । तर ९० लाखको जेसीबी (उनको भनाइ) ले त सडक खन्ने र विभिन्न विकास निर्माणका कार्य समेत गर्न सकिन्छ । त्यसैले उनले कार किन्नु भन्दा यस्ता जेसीबी किन्नु फाइदाजनक देखे । चिसो भनेकै कोकाकोला भने जस्तै जेसीबी ब्रान्डको लोकप्रियताका कारण धेरैले हेभी इक्विपमेन्टलाई जेसीबी भन्ने गरेको पाइन्छ ।

हाल विदेशबाट कार भित्र्याउदा करिव २४० प्रतिशत भन्सार र अन्तःशुल्क लगायतका कार तिर्नु परे पनि हेभी इक्विपमेन्टका लागि भने १ प्रतिशत मात्र कर तिर्नु पर्छ । यदि यसमा पनि कारकै जस्तो कर तिर्नु पर्ने भए कति महंगो पथ्र्यो होला ? यसकारण पनि धेरै हेभी इक्विपमेन्ट व्यवसायीले २०५१ सालका प्रधानमन्त्री मनमोहन अधिकारीलाई सम्झिन्छन् । उनकै पाला देखि यी इक्विपमेन्टमा भन्सार कर हटाइएको थियो ।

प्रसंग हिजो सम्पन्न नेपाल हेभी इक्विपमेन्ट अटो मेकानिकल व्यवसायी संघको साधारण सभाको हो । महावीर पुन विशिष्ट अतिथिको रुपमा साधारण सभामा निम्त्याइएका थिए । माथि उल्लिखित प्रशंग पुनले सोही साधारण सभामा प्रस्तुत गरेका थिए ।

पुनले भने, ‘हेभी इक्विपमेन्ट ल्याएर देश विकास गर्न सम्भव छ । तर देशको अर्थतन्त्र निर्माण गर्न गाहे छ ।’ उनले अनुसन्धान तथा आविष्कार नगरी केही चिज नबनेको बताए । उनले भने, ‘अनुसन्धान नगरी व्यापार हुँदैन । व्यापार नगरी अर्थतन्त्र सुदृढ हुँदैन ।’

महावीर पुनले हाल नेपालमै हेभी इक्विपमेन्ट बनाउन सम्भव नभए पनि १०/२० वर्ष पछि भने बनाउन सकिएला कि भनी आशावादी बने ।

सो अवसरमा नेपाल हेभी इक्विपमेन्ट मेकानिकल व्यवसायी संघले राष्ट्रिय आविष्कार केन्द्रलाई १ लाख ११ हजार १११ रुपैयाँको चेक हस्तान्तरण गरेको थियो ।

कार्यक्रमको मुख्य अतिथि रहेका पूर्वमन्त्री तथा एमाले नेता महेश बस्नेतले पनि आफूसँग तत्काल खल्तीमा रहेको २० हजार रुपैयाँ केन्द्रलाई हस्तान्तरण गरेका थिए ।