लामो समय कुर्नुपर्ने भएपछि क्रेटाको बिकल्प बन्दै अल्काजार

बिश्वब्यापी सेमिकन्डक्टर अभाव र कोभीड महामारीका कारण उत्पादन कटौती गर्नुपरेको हुन्डाईले आफ्ना कतिपय चर्चित मोडलको माग बमोजिम आपूर्ती गर्न सकिरहेको छैन । जसका कारण क्रेटा लगायत केही लोकप्रिय मोडललाई हात पार्न ग्राहकले एब बर्षसम्म कुर्नुपर्ने अबस्था देखिएको छ । यो समस्याबाट सबैभन्दा बढी मारमा कम्प्याक्ट एसयुभी क्रेटा पर्दै आइरहेको छ ।

क्रेटाको माग भारतमा मात्र नभई नेपाल लगायत बिश्वका अन्य राष्ट्रहरुमा समेत उत्तिकै मात्रामा बढिरहेको छ । यो एसयुभीको बढ्दो मागलाई मध्येनजर गर्दै भारतमा उसका डिलरहरुले क्रेटाको सट्टा अल्काजार एसयुभी खरिद गर्नु उत्तम हुने सल्लाह दिन थालेका छन् । त्यसो त अल्काजारलाई समेत ग्राहकले भनेकै समयमा खरिद गर्न सकिने अबस्थामा छैन । यो एसयुभी हात पार्न समेत ग्राहकले ३ महिनासम्म कुर्नुपर्नेछ । क्रेटाको तुलनामा कम समय कुर्नुपर्ने भएपछि ग्राहकले समेत २ लाख भारतीय रुपैयाँ बढी मूल्य तिरेरै भएपनि अल्काजार खरिद गर्न थालेका छन् ।

बजारमा अहिले क्रेटा ११५ एचपी पावर भएको १.५ लिटर पेट्रोल र डिजेल तथा १४० हर्ष पावर भएको १.४ लिटर टर्बो पेट्रोल इन्जिन सहित कुलन तीन इन्जिन अप्सनमा उपलब्ध रहँदै आएको छ । त्यसैगरी अल्काजार भने ११५ हर्षपावर भएको १.५ लिटर डिजेल र १५९ हर्षपावरयुक्त २.० लिटर गरी कुल दुई इन्जिन अप्सनमा उपलब्ध छ ।

भारतीय बजारमा क्रेटाको बिकल्पका रुपमा अल्काजारलाई लिइए पनि नेपालमा भने हालसम्म यो एसयुभी भित्रिने मिती टुंगो लागिसकेको छैन । जसका कारण ग्राहकले कुरेरै भएपनि क्रेटा किन्नुको बिकल्प देखिँदैन । भारतमा जस्तै नेपाली बजारमा समेत क्रेटाको अधिकांश मोडलले अभावको समस्या झेल्नु परेको छ । यो एसयुभीलाई हात पार्न ग्राहकले ६ महिनासम्म कुर्नुपर्ने आधिकारिक बितरक लक्ष्मी इन्टरकन्टिनेन्टल स्रोतले जनाएको छ ।