फक्सवागनले भोली टिग्वान फेसलिफ्ट लन्च गर्ने, थप पावरफुल र फिचर्स लोडेड हुने

जर्मन अटोमेकर फक्सवागनले भोली भारतीय बजारमा २०२२ टिग्वान फेसलिफ्ट लन्च गर्ने भएको छ । यो नयाँ मोडल पहिलेको तुलनमा थप आकर्षक र पावरफुल रहने बताइएको छ । भारतीय रुपैयाँ २५ देखी २९ लाखको रेन्जमा लन्च हुने अपेक्षा गरिएको यो एसयुभीले जिप कम्पास, हुन्डाई टुसान र सिट्रोन सि५ एयरक्रससंग प्रतिस्पर्धा गर्ने देखिएको छ ।

५ सिट क्षमताको यो प्रिमियम एसयुभीमा २.० लिटर क्षमताको फोर सिलिन्डर टिएसआई इन्जिन जडान गरिएको छ । जसको अधिकतम पावर १९० पिएस र टर्क ३२० एनएम रहनेछ । जुन पुरानो मोडलमा जडान गरिएको टिडिआई इन्जिनले प्रदान गर्ने १४३ पिएसको तुलनामा ४७ पिएसले बढी हो । यो एसयुभीमा ७ स्पिड डिएसजी अटोमेटिक ट्रान्समिसन दिइएको छ जसले ४*४ सिस्टममार्फत चारवटै चक्कामा पावर ट्रान्सफर गर्न मद्धत गर्छ ।

यो एसयुभीमा रिडिजाइन गरिएको ग्रिल, परिमार्जन गरिएको फ्रन्ट र रियर बम्पर, नयाँ त्रिकोणात्मक आकारको फग ल्याम्प हाउजिंग, नयाँ सेन्ट्रल एयर इन्टेक, म्याट्रिक्स टेक्नोलोजिको एलइडी सहित थप स्लिक हेडलाइट, नयाँ डिजाइनको १८ इन्च एलोई ह्विल, मरिमार्जन गरिएको एलइडी टेल लाइट र थप फराकिलो स्पेस उपलब्ध गराइएको छ ।

एमक्युबी प्लेटफर्ममा डिजाइन गरिएको यसको क्याबिन लोडेड इक्विपमेन्टका साथ थप आरामदायी र सुबिधासम्पन्न देखिएको छ । जहाँ एप्पल कार प्ले र एन्ड्रोइड अटो सपोर्ट गर्ने ८ इन्चको इन्फोटेन्मेन्ट सिस्टम, ८ तरिकाबाट एड्जस्ट गर्न सकिने पावर ड्राइभर सिट, क्रुज कन्ट्रोल, इन्जिन स्टार्ट/स्टप बटन, कनेक्टिभिटीमा आधारित फिचर्स, लेदर सिट, अटोमेटिक क्लाइमेट कन्ट्रोल, पानारोमिक सनरुफ र अन्य थुप्रै फिचर्स पाउन सकिन्छ ।

त्यसैगरी ६ वटा एरयब्याग, एबिएस, इएसपी, हिल एसिस्ट स्टार्ट, हिल डिसेन्ट कन्ट्रोल, टायर प्रेसर मोनिटरिङ सिस्टम र ड्राइभर अलर्ट लगायत अन्य धेरै प्रकारका सेफ्टि फिचर्स समाबेश गरिएको छ ।