भारतमा मूल्य घट्दा नेपालमा साढे ३ लाख बढी मूल्यमा बीएमडब्लु मोटरसाइकल, यस्तो छ कारण

काठमाडौं – नेपाली बजारमा बीएमडब्लुका दुई मोटरसाइकल बीएस६ जी ३१० जीआर र जी ३१० जीएस मोटरसाइकलको बुकिङ खुला भएको छ । यसका साथै यी मोटरसाइकलको मूल्य समेत तोकिएको छ ।

नेपालका लागि बीएमडब्लुको आधिकारिक वितरक हिमालय मोटरार्डले यी दुई मोटरसाइकलको बुकिङ खोलेको हो । केही दिनमै यी मोटरसाइकल बिक्रीका लागि उपलब्ध हुनेछ ।

नेपाली बजारमा पहिले देखि नै यी मोटरसाइकल उपलब्ध भए पनि हाल बीएस६ मापदण्डयुक्त इन्जिन सहितका मोटरसाइकल भित्रिन लागेका हुन् । जी ३१० जीएसको मूल्य १४ लाख ५० हजार र जी ३१० आरको मूल्य १३ लाख ५० हजार रुपैयाँ तोकिएको छ ।

यो भन्दा पहिले नेपाली बजारमा उपलब्ध यी मोटरसाइकलको मूल्य क्रमशः १० लाख ९० हजार र ९ लाख ७५ हजार रुपैयाँ छ ।

भारतमा भने पहिले उपलब्ध बीएस४ को तुलनामा नयाँ बीएस६ मोटरसाइकलको मूल्य कम छ । कम्पनी स्रोतका अनुसार बीएमडब्लुले भारतीय बजारका लागि मात्र मूल्य कम गरेको र निर्यात बजारका लागि कुनै पनि छुट उपलब्ध नगराएकाले मूल्यमा असर परेको हो । त्यसैगरी नेपाल सरकारले केही समय पहिले सार्वजनिक गरेको नयाँ नीति अनुसार बढी सीसी क्षमताका मोटरसाइकलमा कर बढाएकाले पनि यसमा असर पुगेको छ । यी सबैका कारण मोटरसाइकलको मूल्य बढ्न गएको बताइएको छ ।

यद्यपि नयाँ मोटरसाइकल किन्ने ग्राहकका लागि हिमालय मोटरार्डले प्रि–बुकिङ अफरको रुपमा २० हजार रुपैयाँ छुट र आकर्षक हेल्मेट समेत उपलब्ध गराउने बताएको छ ।