यामाहाले ल्यायो आर१५ भी३ मा आधारित युनिबडी सिट सहितको नयाँ मोटरसाइकल आर१५एस

यामाहाले भारतीय बजारमा आर१५ भी३ लाई फेरि बजारमा उतारेको छ । तर हाल यसको नाम भने यामाहा आर१५एस राखिएको छ । यसमा गरिएको सबैभन्दा ठूलो परिवर्तन युनिबडी सिट हो । अन्य धेरै फिचरहरुमा समानता छ ।

यामाहा मोटर इन्डियाका चेयरम्यान मोटोफुमी सिताराले कम्फर्टेबल पिलियन सिट चाहने राइडरहरु धेरै भएको अनुसन्धानले देखाएको र त्यसैका आधारमा यो मोटरसाइकलको डिजाइन गरिएको बताएका छन् ।

यामाहाले आर१५ रेन्जमा सस्तो मूल्यको मोटरसाइकल उपलब्ध गराउने चाहनाका साथ आर१५ भी४ उतारेको थियो । तर अब आर१५एस बजारमा उपलब्ध हुने र यसको मूल्य पनि भी४ को तुलनामा १३ हजार भारु सस्तो छ । यसको मूल्य १ लाख ५७ हजार ६ सय भारु तोकिएको छ ।

रोचक कुरा के छ भने आर१५एस भी४ भन्दा केही बढी पावरफुल छ । यसले १८.६ पीएस पावर र १४.१ एनएम टर्क जेनेरेट गर्छ । भी४ ले चाहिं १८.४ पीएस पावर जेनेरेट गर्छ ।

रेसिङ ब्लु कलरमा मात्र उपलब्ध यो मोटरसाइकलमा ड्युअल च्यानल एबीएस, असिस्ट एन्ड स्लिपर क्लच, साइड स्ट्यान्ड इन्जिन कट–अफ, एलसीडी इन्स्ट्रयुमेन्ट क्लस्टर आदि फिचर उपलब्ध छन् ।