नाडा अध्यक्षका प्रत्यासी धुब्र थापाले सार्वजनिक गरे ६ बुँदे प्रतिबद्धता

अटोमोबाइल ब्यावसायीहरुको छाता संगठन नाडा अटोमोबाइल्स एसोसिएसन अफ नेपालको नयाँ नेतृत्वका लागि चुनावी रस्साकस्सी बढ्दै गएको छ । २ वर्षे कार्यकाल रहने नाडाको नयाँ नेतृत्वका लागि आगामी मंसिर २२ र २३ गते साधारणसभा हुँदैछ । यसपाली अध्यक्षमा हालको कार्यसमितका उपाध्यक्ष करण कुमार चौधरी र यसअघिका उपाध्यक्ष धुब्र थापा आकांक्षी देखिएका छन् । उनीहरु दुबै जनाले यसअघि नै अध्यक्षमा आफूहरुको दाबेदारी प्रस्तुत गरिसकेका छन् ।

चौधरी सुजुकी गाडीको आधिकारिक बितरक सीजी मोटोकर्पका कार्यकारी निर्देशक हुन् भने थापा फोर्स गाडीको आधिकारिक बितरक आयाम इन्टरकन्टिनेन्टलका अध्यक्ष हुन् । हाल उनीहरु दुबै जना आ–आफ्नो प्यानल तयार पार्न ब्यस्त देखिन्छन् । साथै आफ्नो पक्षमा व्यवसायीहरुको मत आकर्षित गर्न देश दौडाहामा समेत जाने तयारीमा छन् ।

यसैमाझ अध्यक्षका दाबेदार धुब्र थापाले आफूलाई विजयी गराउन व्यवसायीमाझ औपचारिक आह्वान गरेका छन् । थापाले आफू विजयी भएमा नाडामा आफूले खेल्ने भूमिका समेटी ६ बुँदे प्रतिबद्धता पत्र समेत सार्वजनिक गरेका छन् । नाडामा आफू २१ वर्ष देखि कार्यरत रहँदै आएको र २ पटक उपाध्यक्ष भैसकेका कारण यसपाली आफूले नेतृत्व पाउनुपर्ने उनले दाबी गरेका छन् ।

नेतृत्वमा आफू चयन भए नाडामा नीतिगत सुधार गर्ने उनीद्वारा जारी पहिलो प्रतिबद्धतामा भनिएको छ । जसअन्तर्गत व्यवसायमैत्री वातावरण निर्माण गर्न पहल गर्ने, अटोलोनको सीमा बढाउन पहल गर्ने, सवारीसाधन निर्माण र एसेम्बलमा प्रस्ट खाका निर्माण गर्ने, सवारीसाधनलाई अत्यावश्यक साधनको सूचीमा राख्न पहल गर्ने र नीतिगत लबिङ गर्न छुट्टै समितिको स्थापना गर्ने लगायत छन् ।

प्रतिबद्धताको दोस्रो बुँदामा उनले नाडाको सचिवालय सुधार गर्ने बताएका छन् । यसअन्तर्गत नाडाको काम पारदर्शी बनाउन र हरेक सदस्यको गुनासो सुन्न सक्नेगरी सचिवालय सुधार गर्ने, हेल्प डेस्क सञ्चालन गर्ने, समितिहरुले गरेका निर्णयका बारेमा जानकारी दिन प्रविधिको प्रयोग गर्ने र नाडाको आफ्नै भवन निर्माण थाल्ने लगायत बुँदाहरु उल्लेख गरेका छन् ।

त्यसैगरी प्रतिबद्धताको तेस्रो बुँदामा उनले नाडा अटो शोलाई प्रदेश स्तरमा समेत अयोजना गर्ने र अन्तर्राष्ट्रिय स्तरको मान्यता प्राप्त गर्न यसको प्याटेन्ट दर्ता समेत गर्ने उल्लेख गरेका छन् । साथै अन्तर्राष्ट्रिय संघ–संस्थासँग सहकार्य र समन्वय गरेर बृहत अटो शो आयोजना गर्ने उल्लेख गरिएको छ ।

प्रतिबद्धताको चौथो बुँदामा उनले सदस्यहरुको क्षमता अभिवृद्धि गर्न विभिन्न किसिमका तालिम, सेमिनार र गोष्ठीहरु प्रदेश स्तरमा अयोजना गर्ने उल्लेख गरेका छन् ।

हरेक प्रकारका सवारीसाधन, स्पेयर पार्ट्स, टायर लगायत कम्पोनेन्ट, राजस्व, रोजगारी र सडक पूर्वाधार लगायत विषयहरुको वास्तविक तथ्यांक उपलब्ध गराउन डाटा हब निर्माण गरिने प्रतिबद्धताको पाँचौ बुँदामा उल्लेख गरिएको छ ।

छैटौ बुँदामा उनले नाडालाई सामाजिक उत्तरदायित्वमा समेत सक्रिय पार्ने बताएका छन् ।