खुल्यो बीएस६ सुजुकी बर्गम्यान स्ट्रिटको प्रि–बुकिङ, ईसेवाबाट गर्दा १२ हजार सम्म छुट

काठमाडौं – नेपाली बजारमा सुजुकीको बीएस६ बर्गम्यान स्ट्रिट स्कुटर उपलब्ध हुने भएको छ । नेपालका लागि आधिकारिक वितरक भीजी अटोमोबाइल्सले यसको प्रि–बुकिङ गर्न सकिने बताएको छ ।

सुजुकीको आधिकारिक वितरक भीजी अटोमोबाइल्सको वेबसाइटमार्फत उक्त स्कुटर बुकिङ गर्न सकिने र ईसेवामार्फत अनलाइन पेमेन्ट गर्दा १२ हजार रुपैयाँ सम्म छुट उपलब्ध हुने बताइएको छ । आगामी सोमबार सम्मका लागि मात्र यो अवसर उपलब्ध गराइएको समेत कम्पनीको भनाइ छ ।

सुजुकीको उक्त बीएस६ मापदण्डयुक्त बर्गम्यान स्ट्रिट स्कुटरको मूल्य २ लाख ७४ हजार ९ सय रुपैयाँ तोकिएको छ । उक्त स्कुटरमा १२४ सीसीको फोर सिलिन्डर, एयरकुल्ड इन्जिन प्रयोग गरिएको छ, जसले ८.७ पीएस पावर र १० एनएम टर्क जेनेरेट गर्छ । एफआई इन्जिन तथा सीभीटी ट्रान्समिसनयुक्त उक्त स्कुटरमा किक र इलेक्ट्रिक दुवै तरिकाले स्टार्ट गर्न सकिन्छ ।

५.५ लिटरको इन्धन ट्यांकी भएको सो स्कुटरको सिट हाइट ७८० एमएम छ । त्यसैगरी २१.५ लिटरको अन्डर सिट स्टोरेज छ ।

सुजुकी बर्गम्यान स्ट्रिट १२५ एक प्रकारको म्याक्सी स्कुटर हो । म्याक्सी स्कुटर एक प्रकारको टुरिङ स्कुटर हो, जसले हावाबाट चालकलाई बचाउँछ ।

त्यसको लागि स्कुटरको अघिल्लो भागमा विशेष प्रकारको डिजाइन गरिएको हुन्छ र सामान्य स्कुटरभन्दा बढी आरामदायी हुन्छ ।

स्कुटरमा सहजताका लागि ड्युअल लगेज हुक, फ्लेक्जिबल फुट पोजिसन, स्पेसियस सिट, लक्जरियस एलईडी हेडलाइट र पोजिसन लाइट र मल्टी फङसनल फुल डिजिटल मिटर आदि उपलब्ध छन् । यी सबैका कारण छोटो मात्र होइन, लामो दूरीको यात्राका लागि समेत यो स्कुटर उपयोगी छ ।

दसैं पश्चात औपचारिक रुपमा यो स्कुटर नेपाली बजारमा उपलब्ध गराउने तयारी भएको भीजी अटोमोबाइल्सले जनाएको छ ।