एफआईए रिजन टु कार्यकारी समितिमा नासा नेपाल निर्वाचित, भट्टराईले प्रतिनिधित्व गर्ने

फेडेरेशन इन्टरनेशनल डे अटोमोबाइलको रिजन-२ (एशिया प्यासिफिक) कार्यकारी समितिमा नासा नेपाल निर्वाचित भएको छ ।

बुधवार सम्पन्न भर्चुअल माध्यम जुममार्फत भएको निर्वाचनमा राष्ट्रिय खेलकुद परिषद सदस्य (राखेप)का सदस्य तथा नेपाल अटोमोबाइल्स एसोसिएसन (नासा) नेपालका पूर्व महासचिव गोविन्द भट्टराई कोषाध्यक्षमा निर्वाचित भएका छन् । भट्टराई नेपाल माउन्टेन स्पोर्टस फेडेरेशनका अध्यक्ष समेत हुन ।

त्यसै गरी भियतनामको ग्रेग क्राफ्ट अध्यक्षमा तथा तीन उपाध्यक्षहरुमा फेडेरेशन अफ इण्डियन अटोमोबाइल एसोसिएसन्स, अटोमोबाइल्स् एसोसिएसन अफ सिँगापुर तथा इकितान मोटर इन्डोनेशिया विजयी भएको नासा नेपालले जनाएको छ । सम्पन्न निर्वाचनमा सचिवमा अष्ट्रेलियन अटोमोबाइल एसोसिएसन निर्वाचित भएको छ ।

संसारकै ठूलो मोटरिष्टहरुको संस्था एफ.आई.ए.को मोबिलिटि र स्पोर्टस गरी दुई क्षेत्र रहेका छन् भने रिजन–२ मा न्यूजिल्याण्ड देखि मध्य एसिया सम्मका २५ राष्ट्रिय संघहरु आवद्घ छन् । एफएआईको विधान अनुसार एउटा देशमा स्पोर्टस र अटोमोबाइल मोविलिटि एण्ड टुरिजम गरी दुई वा दुईभन्दा धेरै सदस्य संघ बन्न सक्नेछन् भने नेपालमा नासा नेपाल दुवै क्षेत्रको सदस्य संघ हो । नासा नेपालको तर्फबाट सो निर्वाचनमा सहभागी भएका पूर्व महासचिव भट्टराईले सो समितिमा प्रतिनिधित्व गर्नेछन् ।

निर्वाचनमा विजयी भए संगै एक दशक अघि शुरु भएको नेपाली संगठनको अन्तर्राष्ट्रिय यात्रा महादेशिय नेतृत्व तहमा पुगेको छ ।