चाङ्गनका प्रशन्न पन्त भन्छन – अबको बजार चिनियाँ ब्रान्डको

अटो बजारमा अहिले इलेक्ट्रिक कार र चिनियाँ ब्रान्ड सर्बाधिक चर्चाको बिषय बनिरहेको छ । एकातिर इलेक्ट्रिक कारको माग उच्च भएपनि आयतकर्ता कम्पनीले आपूर्ति गर्न सकिरहेका छैनन भने अर्कोतर्फ एकपछि अर्को चिनियाँ ब्रान्डका प्यासेन्जर कार भित्रिइरहेका छन् । यी दुबै विषयले अटो बजारको विद्यमान गतिशीलतालाई थप प्रस्ट्याएको छ भने भोलिका दिनमा अटो बजारले झनै गति लिने आशा समेत देखाएको छ ।

एकदशक अघि नेपाल भित्रिएर बजारबाट एकाएक बिलय भएका ग्रेटवाल र चेरीजस्ता ब्रान्डलाई पुनः स्थापित गराउने लक्ष्यसहित ठूला व्यावसायिक घराना विशाल ग्रुप र शारडा ग्रुप चिनियाँ ब्रान्डको प्रवद्र्धनमा होमिएका छन् । त्यसैगरी देशकै दोस्रो ठूलो अटोमोबाइल कम्पनी एमएडब्लु ग्रुपले चिनियाँ बजारमा सर्बाधिक खपत हुने ब्रान्ड चाङ्गनलाई छिट्टै बजारमा उतार्ने तयारी तीव्र बनाएको छ । त्यसैगरी अन्य ठूला व्यावसायिक घरनाहरुले समेत अहिले चिनियाँ ब्रान्डमा नजर डुलाइरहेका छन् । जसका कारण यसअघि बद्नाम बनेको चिनियाँ ब्रान्डले बजारमा दमदार उपस्थिति जनाउँदै भोलिका दिनमा भारतीय र कोरियन लागयत अन्य ब्रान्डका लागी ठूलै चुनौती पेश गर्ने पक्कापक्की जस्तै देखिन्छ ।

यसै सन्दर्भभा चाङ्गन ब्रान्डको आधिकारिक वितरक एमएडब्लु वृद्धि अटोकर्पका डीजीएम प्रशन्न पन्त भन्छन्, ‘विश्वको दोस्रो ठूलो अर्थतन्त्र बनेको चीन विश्वकै सबैभन्दा बढी सवारी साधन उत्पादन र खपत गर्ने मुलुक समेत हो । हाल चीनमा उत्पादन हुने अधिकांश ब्रान्डले विश्व बजारमा प्रभाव जमाउन थालिसकेको छ ।’ उनका अनुसार जसरी जापनिज, अमेरिकन, युरोपियन हुँदै कोरियन ब्रान्डले एकपछि अर्र्को बजारमा प्रभाव जमाउन सफल भए अहिले चिनियाँ ब्रान्डले समेत विश्वव्यापी रुपमा आफ्नो प्रभाव सोही रफ्तारमा विस्तार गर्न थालिसकेको छ ।

प्रविधि, डिजाइन र नयाँपनमा जोड दिँदै अघि बढिरहेको चिनियाँ ब्रान्डले १ दशक अघिको तुलनामा अहिले निकै ठूलो फड्को मारिसकेको उनले दाबी गरे । जसका कारण पनि चिनियाँ ब्रान्डको प्रभाव विश्वव्यापी बिस्तार हुन सफल भएको र अबको बजार यस्ता ब्रान्डको पकडमा जाने उनको ठहर छ ।

पन्तका अनुसार प्रतिस्पर्धी मूल्यमा अत्याधुनिक र सुबिधासम्पन्न सवारीसाधन उत्पादनलाई तीव्रता दिएको चीनले भविष्यलाई लक्ष्यित गरी इनोभेटिभ र प्रविधिमैत्री साधन उत्पादन गर्दै आइरहेको छ । अबको केही समयभित्रै नेपाल भित्रिन लागेका चाङ्गन ब्रान्डका कारमा समेत ग्राहकले यस्तो विशेषतालाई महशुृस गर्न सक्ने उनले बताए । ‘चाङ्गन १ हजार भन्दा बढी भेरिएन्टमा सवारीसाधन उत्पादन गर्ने कम्पनी हो । हामीले सबै भेरियन्टलाई नेपाली बजारमा ल्याउन नसकेपनि नेपाली उपभोक्ताले आफूलाई अपग्रेड गर्न उपयुक्त ठान्ने मोडललाई प्राथमिकता साथ भित्र्याउँदै जाने योजना बनाएका छौ’ उनले भने, ‘पहिलो चरणमा सेडान र पिकअप भित्र्याइसकेपछि लगत्तै एसयूभी र त्यसपछि इलेक्ट्रिक कार समेत भित्र्याउँदै जाने योजना बनाएका छौ ।’ बिक्री र बिक्री पछिको सेवाका लागि शोरुम र सर्भिस सेन्टर निर्माणको कामले अहिले गति लिइरहेको उनले बताए ।