यसरी हटाउन सकिन्छ कारमा लागेको वाटरमार्क वा रेनस्पट

कारलाई नियमित रुपमा सफा गरिरहदा वा मर्मत गरिरहदा पनि धेरैजसो यसको वाहिरी भागमा वाटरमार्क वा रेनस्पट रहन सक्छ । दैनिक रुपमा स्याम्पु वा अन्य कुनै पदार्थदे सफा गरे पनि धेरै कारधनीहरुले यो समस्या भोगेको पाइन्छ ।

पानीले कार सफा गर्दा पानीमा भएका मिनरल कन्टेन्टका कारण यस्ता फोहोर पदार्थ रहने गर्छ । पानी वाष्पिकरण भएर उडे पनि यस्ता पदार्थ भने रहिरहन्छन् ।

यस्ता पदार्थ विशेष गरी तीन कारणले उत्पन्न हुन्छन् । विशेष गरी धारामा आउने पानीमा विभिन्न प्रकारका मिनरलका कारण पानी कडा हुन्छ । यसलाई हार्ड वाटर भनिन्छ । गाडीको वाहिरी भागमा रहेको पेन्टमा बसे भने यस्ता पदार्थलाई हटाउन पनि समस्या हुन्छ ।

त्यसैगरी उच्च रुपमा मिनरल कन्टेन्ट सहितका पानीका थोपाले पनि वाटरमार्क बनाउछ । उच्च रुपमा रहेका सल्फ्युरिक एसिड र नाइट्रिक एसिडसहितका एसिड रेनका कारण धेरैजसो यस्तो हुन्छ । हार्ड वाटर भन्दा यसका कारण बनेका वाटरमार्क हटाउन अझै समस्या हुन्छ ।

घामका कारण गाडीको वाहिरी भागमा रहेको पानी सुक्छ र त्यहाँ भएका मिनरल कन्टेन्टहरु कारको पेन्टसँग मिसिएर रहन्छन् । यो खाले वाटरमार्क हटाउन झनै असहज हुन्छ ।

त्यसैले यी सबै समस्याबाट बच्नका लागि कारलाई सके सम्म फोहोर पानीबाट बचाउनु पर्छ भने कारमा भएको पानीलाई घाममा तुरुन्तै सुकाएर हटाउनु पनि हुँदैन ।

यस्ता वाटरमार्क वा रेनस्पट हटाउनका लागि हामीले कारलाई वासिङ वा सर्भिस सेन्टरमै लैजानु राम्रो हुन्छ । यद्यपि हामी आफैले पनि यसलाई सफा गर्न सकिन्छ ।

यसका लागि सबैभन्दा पहिले प्रभावित क्षेत्रमा पानीले भिजाउनु पर्छ । यसका लागि कार स्याम्पुको प्रयोग गर्न सकिन्छ । बराबर रेसियोमा ह्वाइट भिनेगर र डिस्टिल वाटर मिसाएर स्पन्जको सहयोगले प्रभावित क्षेत्रमा विस्तारै एक दुई पटक पुछ्नु पर्छ । त्यसपछि सफा र सुख्खा तावेलले पुछ्नु पर्छ ।

त्यसैगरी नजिकको कुनै पार्ट्स पसल वा अटोमोटिभ पसलमा गएर यसका लागि रेडीमेड सामग्री ल्याएर प्रयोग गर्न पनि सकिन्छ । दिइएको निर्देशन अनुसार उपयुक्त रुपमा सफा गर्न सकिन्छ ।

यदि आफूलाई सफा गर्न आएन र सकिएन भने स्थानीय डिलर वा सर्भिस सेन्टरमा कारलाई पु¥याएर सफा गर्न पनि सकिन्छ ।